Жиноят ишлари бўйича Мирзо Улуғбек тумани судида ўз боласини сотган онага нисбатан ҳукм ўқилди. Бу ҳақда «Ёшлар» телеканалининг «Янги давр» информацион дастурида маълум қилинди.
Маълум қилинишича, судланувчи 1998 йили Наманган вилоятида туғилган. Турмушга чиқмаган. 2020 йилда Тошкентга ишлаш учун келади ва ўша йилнинг ноябрь ойида ҳомиладор бўлиб қолади. 2021 йилнинг июль ойи бошларида ижарада бирга яшаб турган таниши ундан туғилажак боласини ўзига беришини сўрайди. У бунинг учун пул таклиф қилган.
Судланувчи 19 август куни дугонаси билан олдиндан тил бириктириб, ўзининг уч кунлик фарзандини сотиш ва бунинг орқасидан моддий бойлик орттириш режасини тузган. У чақалоғини 9 минг долларга сотаётган вақтида департаментнинг Тошкент шаҳар Мирзо Улуғбек тумани ва ДХХ ходимлари томонидан ўтказилган тадбирда ашёвий далиллар билан ушланган.
«Бирга яшаб келган опа боламни сотишимни сўради. Мен сотмаслигимни, бола ўзимизга ҳам кераклигини айтдим. Шунда у ўзининг эрига болани сотишимни айтиб, ундан пул ундиришимизга ундади», — дейди судланувчи.
Суд ҳукмига кўра, аёл Жиноят кодексининг 135-моддаси (одам савдоси) 3-қисми «а» банди билан айбдор деб топилган ва унга 6 йилга озодликдан маҳрум қилиш жазоси тайинланган. Аёлнинг фарзанди эса васийлик органларига топширилган.
Аввалроқ Самарқандда аёл уй олиш учун 6 ёшли ўғлини 6 минг долларга сотмоқчи бўлганида қўлга олингани, Навоийда фарзандини 85 миллион сўмга сотишга уринган эр-хотин жиноят устида ушлангани тўғрисида хабар берилганди.
Изоҳ (0)