APL. Klopp va Gvardiola to‘qnashuvi, “Manchester Yunayted” “Everton”ni mehmon qiladi, “Tottenhem” “Aston Villa” sinovidan o‘tadi
“Manchester Yunayted” — “Everton”, 2-oktabr, 16:30
Ole-Gunnar Sulsher shogirdlari oxirgi 6 turdan so‘ng 13 ochko jamg‘argan 5 ta jamoadan biri. Qo‘shimcha ko‘rsatkichlar evaziga “qizil iblislar” musobaqa jadvalining 4-o‘rinida turibdi.
Sentabr oyi “Manchester Yunayted” uchun og‘ir keldi. YChLda “Yang Boyz”dan uchralgan mag‘lubiyat (1:2), Angliya Liga Kubogidan chiqib ketish va o‘tgan turda “Aston Villa”ga boy berilgan imkoniyat (0:3). Faqatgina Chempionlar Ligasining 2-turida “Vilyarreal” ustidan qozonilgan g‘alabagina Sulsher jamoasi joniga oro kirdi. Krishtianu Ronaldu so‘nggi daqiqalarda g‘alaba golini urdi.
“Everton” ham 13 ochko jamg‘argan va boshqa jamoalardan farqli ravishda 5-o‘rinni band etib turibdi. Benites qo‘l ostida jamoa mavsumni muvaffaqiyatli boshladi. To‘rtta g‘alaba va bitta mag‘lubiyat. 6-turda “Everton” “Norvich” ustidan ishonchli g‘alabani qo‘lga kiritdi.
“Liverpul” — “Manchester Siti”, 3-oktabr, 20:30
“Liverpul” Gvardiola jamoasiga qarshi o‘yinda musobaqa yetakchisi sifatida qatnashadi. Yurgen Klopp shogirdlari 2-o‘rindagi jamoadan (ikkinchi o‘rinni aynan “Manchester Siti” egallab turibdi) bir ochko oldinda. Ortda qolgan 6 ta turdan so‘ng “Liverpul” hisobida 14 ochko mavjud. “Liverpul” oldida chempionatdagi mag‘lubiyatsiz seriyani davom ettirish vazifasi turibdi. Oldinda esa qiyin raqib.
Birinchi turda “Tottenhem”dan qabul qilib olingan mag‘lubiyat “Manchester Siti” uchun chempionatdagi yagona omadsizlik bo‘lib turibdi. Shundan buyon Gvardiola shogirdlari 4 ta g‘alaba va 1 ta durang natija qayd etdi. 6-turda “Chelsi” bilan o‘ynagan (1:0) “Manchester Siti” hafta o‘rtasida Chempionlar Ligasi doirasida “PSJ”ga qarshi bahs olib bordi va yutqazib qo‘ydi (0:2). Endi esa navbatdagi qiyin raqib — “Liverpul” kutib turibdi.
Qolgan uchrashuvlar:
2-oktabr, shanba
“Byornli” — “Norvich”, 19:00
“Chelsi” — “Sauthempton”, 19:00
“Lids” — “Uotford”, 19:00
“Nyukasl” — “Vulverhempton”, 19:00
“Brayton” — “Arsenal”, 21:00
3-oktabr, yakshanba
“Kristal Pelas” — “Lester”, 18:00
“Tottenhem” — “Aston Villa”, 18:00
“Vest Hem” — “Brentford”, 18:00
La Liga. Turning markaziy uchrashuvida “Atletiko” “Barselona”ni qabul qiladi, “Real” Kataloniyaga safar qiladi
“Atletiko” — “Barselona”, 2-oktabr, 00:00
Ortda qolgan 7 turdan so‘ng “Atletiko” musobaqa jadvalida 4-o‘rinni egallab turibdi. Diyego Simeone shogirdlari o‘tgan turda “Alaves”ga mag‘lub bo‘lmaganda 1-o‘rinda turishi ham mumkin edi. “Matraschilar” musobaqa autsayderiga 0:1 hisobida yutqazib qo‘ydi.
Hafta o‘rtasida “Atletiko” Chempionlar Ligasida “Milan”ga qarshi o‘ynadi va 2:1 hisobida g‘alaba qozondi. To‘g‘ri, milanliklar qizil kartochka oldi, madridliklar so‘nggi daqiqalarda ikkita gol urdi va qiyinchilik bilan 3 ochkoni qo‘lga kiritdi.
Tez orada “Barselona” yangi murabbiyni jamoaga olib kelsa kerak. YChLda “Barselona” “Benfika”ga 0:3 hisobida imkoniyatni boy berdi. Kataloniyaliklar barcha musobaqalarda omadsizlikka uchramoqda. La Ligada ham 12 ochko bilan 6-o‘rinda turibdi. Agar “Atletiko” ham g‘alaba qozonsa, Ronald Kuman iste’foga chiqarilishi mumkin.
“Espanyol” — “Real Madrid”, 3-oktabr, 19:15
“Espanyol” 7 turdan so‘ng 6 ochko bilan 14-o‘rinda bormoqda. Kataloniya jamoasi ushbu mavsumda faqatgina bir marotaba, “Alaves” ustidan g‘alaba qozona oldi. 1 ta g‘alaba, 3 ta mag‘lubiyat va 3 ta durang natija qayd etgan Visente Moreno shogirdlari “Real”ga qanday “syurprizlar” tayyorlab qo‘ygani noma’lum.
Karlo Anchelotti jamoasi 17 ochko bilan chempionat peshqadami bo‘lib turibdi. Mavsum boshidanoq Karim Benzema va Vinisiusning o‘zaro kelishib o‘ynashi, jamoaga muhim bo‘lgan ochkolarni olib keldi. YChLda esa “Real” kutilmaganda o‘z uyida Moldovaning “Sherif” jamoasiga mag‘lub bo‘ldi. Madridliklar o‘sha o‘yindagi mag‘lubiyat alamini ham “Espanyol”dan olish ilinjida maydonga tushadi.
Qolgan uchrashuvlar:
2-oktabr, shanba
“Osasuna” — “Rayo Valyekano”, 17:00
“Malyorka” — “Levante”, 19:15
“Kadis” — “Valensiya”, 21:30
3-oktabr, yakshanba
“Elche” — “Selta”, 17:00
“Xetafe” — “Real Sosyedad”, 21:30
“Vilyarreal” — “Betis”, 21:30
“Granada” — “Sevilya”, 00:00
A Seriya. Turinda derbi, “Atalanta” “Milan” bilan bahs olib boradi, Shomurodov to‘p suradigan “Roma” esa “Empoli”ni chig‘iriqdan o‘tkazadi
“Torino” — “Yuventus”, 2-oktabr, 21:00
“Torino” o‘tgan mavsumda quyi divizionga tushib ketmaslik vazifasini a’lo darajada bajargandi. Ushbu mavsumda esa jamoa 8 ochko bilan 9-o‘rinda bormoqda. Jamoa oxirgi 4 turdan buyon mag‘lubiyatga uchramayapti (2 ta g‘alaba, 2 ta durang).
Massimiliano Allegri shogirdlari uchun mavsum dahshatli boshlandi. Krishtianu Ronaldusiz qolgan jamoa A Seriyada 10-o‘rinni egallab turibdi. Bu esa “Yuventus”ning muammolari jiddiyligini bildiradi.
Allegri asta-sekin kamchiliklarni bartaraf qilyapti. Chempionatda oxirgi turda “Sampdoriya” va Chempionlar Ligasida “Chelsi” ustidan qozonilgan g‘alabalar jamoaga kayfiyat bag‘ishlaydi. Skudetto uchun kurashga nazariya jihatdan imkoniyat mavjud.
“Atalanta” — “Milan”, 3-oktabr, 23:45
“Atalanta” mavsumni “Torino” ustidan qozonilgan g‘alaba bilan boshladi (2:1). Keyingi 5 turda 2 ta durang, 2 ta g‘alaba va 1 ta mag‘lubiyat qayd etdi. Oxirgi turda “Inter” bilan 2:2 hisobida durangga erishdi. “Atalanta” 11 ochko bilan 7-o‘rinni egallab turibdi.
“Milan” mavsumni omadli o‘tkazmoqda. 6 turdan so‘ng 5 ta g‘alaba va 1 ta durang natija. Milanliklar musobaqa jadvalida ikkinchi o‘rinda bormoqda va peshqadam “Napoli”dan 2 ochko ortda qolgan. Stefano Pioli shogirdlari chempionlikni jiddiy maqsad qilgan.
1-oktabr, juma
“Kalyari” — “Venetsiya”, 23:45
2-oktabr, shanba
“Salernitana” — “Jenoa”, 18:00
“Sassuolo” — “Inter”, 23:45
3-oktabr, yakshanba
“Bolonya” — “Latsio”, 15:30
“Verona” — “Spetsiya”, 18:00
“Sampdoriya” — “Udineze”, 18:00
“Fiorentina” — “Napoli”, 21:00
“Roma” — “Empoli”, 21:00
Liga 1. “PSJ” Rennga safar qiladi, “Lill” “Marsel” bilan hisob-kitob qiladi
“Renn” — “PSJ”, 3-oktabr, 16:00
“Renn” Fransiya chempionatining ortda qolgan 8 turida 9 ochko jamg‘ara oldi. Bruno Jenezio shogirdlari 13-o‘rinni egallab turibdi. Lekin oxirgi o‘yinlarga qarasak, “Renn” mag‘lubiyatga uchramayapti, uyda “Klermon” ustidan 6:0 hisobidagi g‘alaba, “Bordo” bilan 1:1 hisobidagi durang. Jamoaning ushbu mavsumdagi eng katta yo‘qotishi Kamavingani “Real”ga qo‘yib yuborgani bo‘ldi.
“PSJ” yozgi transferlar vaqtida juda katta xaridlarni amalga oshirdi. Fransiya chempionatida hozirgacha birorta mag‘lubiyatga uchramadi. 8 turda 8 ta g‘alaba. Gollar nisbati 22:7. Yo‘qotishlar borasida muammo yo‘q. Faqatgina Serxio Ramosning debyuti kechikmoqda.
1-oktabr, juma
“Lans” — “Reyms”, 00:00
2-oktabr, shanba
“Monpelye” — “Strasbur”, 20:00
“Nitssa” — “Brest”, 00:00
3-oktabr, yakshanba
“Anjer” — “Mets”, 18:00
“Loryan” — “Klermon”, 18:00
“Monako” — “Bordo”, 18:00
“Nant” — “Trua”, 18:00
“Lill” — “Marsel”, 20:00
“Sent-Etyen” — “Lion”, 23:45
Bundesliga. “Augsburg” alamzada “Borussiya D”ga qarshi, “Bavariya” navbatdagi g‘alabaga tayyor, “Volfsburg” kuchli uchlikdagi o‘rnini saqlab qolishga urinadi
“Bavariya” — “Ayntraxt”, 3-oktabr, 20:30
Yulian Nagelsmann shogirdlari Germaniya Bundesligasida 16 ochko bilan yetakchilik qilmoqda. “Bavariya” oxirgi 5 o‘yinida o‘rtacha 4,40 tadan gol urmoqda. 8 o‘yindan buyon faqat g‘alaba qozonib kelmoqda. Navbatdagi raqib ham myunxenliklarga qarshilik qilishga qodir emasdek ko‘rinmoqda.
“Ayntraxt” oxirgi 6 o‘yinida 5 ta durang natija qayd etdi. Faqatgina Yevropa Ligasida “Antverpen” kichik hisobda taslim etildi. Bundesligada 6 o‘yinda 5 ochko to‘play oldi va 14-o‘rinda bormoqda.
1-oktabr, juma
“Kyoln” — “Groyter”, 23:30
2-oktabr, shanba
“Herta” — “Frayburg”, 18:30
“Shtutgart” — “Hoffenhaym”, 18:30
“Volfsburg” — “Borussiya M”, 18:30
“Borussiya D” — “Augsburg”, 18:30
“Leypsig” — “Boxum”, 21:30
3-oktabr, yakshanba
“Mayns” — “Union”, 18:30
“Arminiya” — “Bayer”, 22:30
Ma’rufjon Ochilov tayyorladi
Izoh (0)