АПЛ. Клопп ва Гвардиола тўқнашуви, «Манчестер Юнайтед» «Эвертон»ни меҳмон қилади, «Тоттенҳэм» «Астон Вилла» синовидан ўтади
«Манчестер Юнайтед» — «Эвертон», 2 октябрь, 16:30
Оле-Гуннар Сульшер шогирдлари охирги 6 турдан сўнг 13 очко жамғарган 5 та жамоадан бири. Қўшимча кўрсаткичлар эвазига «қизил иблислар» мусобақа жадвалининг 4-ўринида турибди.
Сентябрь ойи «Манчестер Юнайтед» учун оғир келди. ЕЧЛда «Янг Бойз»дан учралган мағлубият (1:2), Англия Лига Кубогидан чиқиб кетиш ва ўтган турда «Астон Вилла»га бой берилган имконият (0:3). Фақатгина Чемпионлар Лигасининг 2-турида «Вильярреал» устидан қозонилган ғалабагина Сульшер жамоаси жонига оро кирди. Криштиану Роналду сўнгги дақиқаларда ғалаба голини урди.
«Эвертон» ҳам 13 очко жамғарган ва бошқа жамоалардан фарқли равишда 5-ўринни банд этиб турибди. Бенитес қўл остида жамоа мавсумни муваффақиятли бошлади. Тўртта ғалаба ва битта мағлубият. 6-турда «Эвертон» «Норвич» устидан ишончли ғалабани қўлга киритди.
«Ливерпуль» — «Манчестер Сити», 3 октябрь, 20:30
«Ливерпуль» Гвардиола жамоасига қарши ўйинда мусобақа етакчиси сифатида қатнашади. Юрген Клопп шогирдлари 2-ўриндаги жамоадан (иккинчи ўринни айнан «Манчестер Сити» эгаллаб турибди) бир очко олдинда. Ортда қолган 6 та турдан сўнг «Ливерпуль» ҳисобида 14 очко мавжуд. «Ливерпуль» олдида чемпионатдаги мағлубиятсиз серияни давом эттириш вазифаси турибди. Олдинда эса қийин рақиб.
Биринчи турда «Тоттенҳэм»дан қабул қилиб олинган мағлубият «Манчестер Сити» учун чемпионатдаги ягона омадсизлик бўлиб турибди. Шундан буён Гвардиола шогирдлари 4 та ғалаба ва 1 та дуранг натижа қайд этди. 6-турда «Челси» билан ўйнаган (1:0) «Манчестер Сити» ҳафта ўртасида Чемпионлар Лигаси доирасида «ПСЖ»га қарши баҳс олиб борди ва ютқазиб қўйди (0:2). Энди эса навбатдаги қийин рақиб — «Ливерпуль» кутиб турибди.
Қолган учрашувлар:
2 октябрь, шанба
«Бёрнли» — «Норвич», 19:00
«Челси» — «Саутҳэмптон», 19:00
«Лидс» — «Уотфорд», 19:00
«Ньюкасл» — «Вулверҳэмптон», 19:00
«Брайтон» — «Арсенал», 21:00
3 октябрь, якшанба
«Кристал Пэлас» — «Лестер», 18:00
«Тоттенҳэм» — «Астон Вилла», 18:00
«Вест Ҳэм» — «Брентфорд», 18:00
Ла Лига. Турнинг марказий учрашувида «Атлетико» «Барселона»ни қабул қилади, «Реал» Каталонияга сафар қилади
«Атлетико» — «Барселона», 2 октябрь, 00:00
Ортда қолган 7 турдан сўнг «Атлетико» мусобақа жадвалида 4-ўринни эгаллаб турибди. Диего Симеоне шогирдлари ўтган турда «Алавес»га мағлуб бўлмаганда 1-ўринда туриши ҳам мумкин эди. «Матрасчилар» мусобақа аутсайдерига 0:1 ҳисобида ютқазиб қўйди.
Ҳафта ўртасида «Атлетико» Чемпионлар Лигасида «Милан»га қарши ўйнади ва 2:1 ҳисобида ғалаба қозонди. Тўғри, миланликлар қизил карточка олди, мадридликлар сўнгги дақиқаларда иккита гол урди ва қийинчилик билан 3 очкони қўлга киритди.
Тез орада «Барселона» янги мураббийни жамоага олиб келса керак. ЕЧЛда «Барселона» «Бенфика»га 0:3 ҳисобида имкониятни бой берди. Каталонияликлар барча мусобақаларда омадсизликка учрамоқда. Ла Лигада ҳам 12 очко билан 6-ўринда турибди. Агар «Атлетико» ҳам ғалаба қозонса, Рональд Куман истеъфога чиқарилиши мумкин.
«Эспаньол» — «Реал Мадрид», 3 октябрь, 19:15
«Эспаньол» 7 турдан сўнг 6 очко билан 14-ўринда бормоқда. Каталония жамоаси ушбу мавсумда фақатгина бир маротаба, «Алавес» устидан ғалаба қозона олди. 1 та ғалаба, 3 та мағлубият ва 3 та дуранг натижа қайд этган Висенте Морено шогирдлари «Реал»га қандай «сюрпризлар» тайёрлаб қўйгани номаълум.
Карло Анчелотти жамоаси 17 очко билан чемпионат пешқадами бўлиб турибди. Мавсум бошиданоқ Карим Бензема ва Винисиуснинг ўзаро келишиб ўйнаши, жамоага муҳим бўлган очколарни олиб келди. ЕЧЛда эса «Реал» кутилмаганда ўз уйида Молдованинг «Шериф» жамоасига мағлуб бўлди. Мадридликлар ўша ўйиндаги мағлубият аламини ҳам «Эспаньол»дан олиш илинжида майдонга тушади.
Қолган учрашувлар:
2 октябрь, шанба
«Осасуна» — «Райо Вальекано», 17:00
«Мальорка» — «Леванте», 19:15
«Кадис» — «Валенсия», 21:30
3 октябрь, якшанба
«Элче» — «Сельта», 17:00
«Хетафе» — «Реал Сосьедад», 21:30
«Вильярреал» — «Бетис», 21:30
«Гранада» — «Севилья», 00:00
А Серия. Туринда дерби, «Аталанта» «Милан» билан баҳс олиб боради, Шомуродов тўп сурадиган «Рома» эса «Эмполи»ни чиғириқдан ўтказади
«Торино» — «Ювентус», 2 октябрь, 21:00
«Торино» ўтган мавсумда қуйи дивизионга тушиб кетмаслик вазифасини аъло даражада бажарганди. Ушбу мавсумда эса жамоа 8 очко билан 9-ўринда бормоқда. Жамоа охирги 4 турдан буён мағлубиятга учрамаяпти (2 та ғалаба, 2 та дуранг).
Массимилиано Аллегри шогирдлари учун мавсум даҳшатли бошланди. Криштиану Роналдусиз қолган жамоа А Серияда 10-ўринни эгаллаб турибди. Бу эса «Ювентус»нинг муаммолари жиддийлигини билдиради.
Аллегри аста-секин камчиликларни бартараф қиляпти. Чемпионатда охирги турда «Сампдория» ва Чемпионлар Лигасида «Челси» устидан қозонилган ғалабалар жамоага кайфият бағишлайди. Скудетто учун курашга назария жиҳатдан имконият мавжуд.
«Аталанта» — «Милан», 3 октябрь, 23:45
«Аталанта» мавсумни «Торино» устидан қозонилган ғалаба билан бошлади (2:1). Кейинги 5 турда 2 та дуранг, 2 та ғалаба ва 1 та мағлубият қайд этди. Охирги турда «Интер» билан 2:2 ҳисобида дурангга эришди. «Аталанта» 11 очко билан 7-ўринни эгаллаб турибди.
«Милан» мавсумни омадли ўтказмоқда. 6 турдан сўнг 5 та ғалаба ва 1 та дуранг натижа. Миланликлар мусобақа жадвалида иккинчи ўринда бормоқда ва пешқадам «Наполи»дан 2 очко ортда қолган. Стефано Пиоли шогирдлари чемпионликни жиддий мақсад қилган.
1 октябрь, жума
«Кальяри» — «Венеция», 23:45
2 октябрь, шанба
«Saleрнитана» — «Женоа», 18:00
«Сассуоло» — «Интер», 23:45
3 октябрь, якшанба
«Болонья» — «Лацио», 15:30
«Верона» — «Специя», 18:00
«Сампдория» — «Удинезе», 18:00
«Фиорентина» — «Наполи», 21:00
«Рома» — «Эмполи», 21:00
Лига 1. «ПСЖ» Реннга сафар қилади, «Лилль» «Марсель» билан ҳисоб-китоб қилади
«Ренн» — «ПСЖ», 3 октябрь, 16:00
«Ренн» Франция чемпионатининг ортда қолган 8 турида 9 очко жамғара олди. Бруно Женезио шогирдлари 13-ўринни эгаллаб турибди. Лекин охирги ўйинларга қарасак, «Ренн» мағлубиятга учрамаяпти, уйда «Клермон» устидан 6:0 ҳисобидаги ғалаба, «Бордо» билан 1:1 ҳисобидаги дуранг. Жамоанинг ушбу мавсумдаги энг катта йўқотиши Камавингани «Реал»га қўйиб юборгани бўлди.
«ПСЖ» ёзги трансферлар вақтида жуда катта харидларни амалга оширди. Франция чемпионатида ҳозиргача бирорта мағлубиятга учрамади. 8 турда 8 та ғалаба. Голлар нисбати 22:7. Йўқотишлар борасида муаммо йўқ. Фақатгина Серхио Рамоснинг дебюти кечикмоқда.
1 октябрь, жума
«Ланс» — «Реймс», 00:00
2 октябрь, шанба
«Монпелье» — «Страсбур», 20:00
«Ницца» — «Брест», 00:00
3 октябрь, якшанба
«Анжер» — «Мец», 18:00
«Лорян» — «Клермон», 18:00
«Монако» — «Бордо», 18:00
«Нант» — «Труа», 18:00
«Лилль» — «Марсель», 20:00
«Сент-Этен» — «Лион», 23:45
Бундеслига. «Аугсбург» аламзада «Боруссия Д»га қарши, «Бавария» навбатдаги ғалабага тайёр, «Вольфсбург» кучли учликдаги ўрнини сақлаб қолишга уринади
«Бавария» — «Айнтрахт», 3 октябрь, 20:30
Юлиан Нагелсманн шогирдлари Германия Бундеслигасида 16 очко билан етакчилик қилмоқда. «Бавария» охирги 5 ўйинида ўртача 4,40 тадан гол урмоқда. 8 ўйиндан буён фақат ғалаба қозониб келмоқда. Навбатдаги рақиб ҳам мюнхенликларга қаршилик қилишга қодир эмасдек кўринмоқда.
«Айнтрахт» охирги 6 ўйинида 5 та дуранг натижа қайд этди. Фақатгина Европа Лигасида «Антверпен» кичик ҳисобда таслим этилди. Бундеслигада 6 ўйинда 5 очко тўплай олди ва 14-ўринда бормоқда.
1 октябрь, жума
«Кёльн» — «Гройтер», 23:30
2 октябрь, шанба
«Ҳерта» — «Фрайбург», 18:30
«Штутгарт» — «Ҳоффенҳайм», 18:30
«Вольфсбург» — «Боруссия М», 18:30
«Боруссия Д» — «Аугсбург», 18:30
«Лейпциг» — «Бохум», 21:30
3 октябрь, якшанба
«Майнц» — «Унион», 18:30
«Арминия» — «Байер», 22:30
Маъруфжон Очилов тайёрлади
Изоҳ (0)