Toshkent hokimligi 29-sentabr kuni Fransiyaning Veolia kompaniyasi bilan 30 yil muddatga shaharning markazlashtirilgan issiqlik ta’minoti tizimini ekspluatatsiya qilish, texnik xizmat ko‘rsatish va boshqarish uchun konsessiya shartnomasini imzoladi. Bu haqda Moliya vazirligi matbuot xizmati xabar berdi.
Poytaxtga qarashli eng yirik issiqlik tarmog‘i 1,2 millionga yaqin aholini yoki shahar aholisining deyarli yarmini issiqlik va issiq suv bilan ta’minlaydi. Tizimga 3 ta yirik gazli isitish moslamasi, 200 dan ortiq mahalliy qozonxonalar va 1926 kilometr, shundan 73 foizi yer ostida bo‘lgan quvurlar kiradi.
Xabarda aytilishicha, ikki yil davomida poytaxtning Bektemir va Sergeli tumanlarida isitish tizimini modernizatsiya qilish bo‘yicha sinov loyihasi amalga oshiriladi. Sinov loyihasi yakunlangach, butun shaharni modernizatsiya qilish bo‘yicha dastur ishga tushiriladi.
Ma’lumot uchun, Toshkent aholi soni jihatidan ham, issiqlik tarmoqlarining ko‘lami bo‘yicha ham O‘zbekistonning eng katta shahridir. Bu yerda 9 ming 165 ta ko‘p qavatli uy, 3 ming 475 ta ijtimoiy obyekt markazlashgan issiqlik ta’minotiga ulangan. Lekin magistral va tarqatish tarmoqlarning 72 foizi, markaziy qozonxonalarning hammasi, mahalliy qozonxonalarning 90 foizi eskirgan.
Bu xarajatlarning haddan ziyod ortib, xizmat sifati pasayishiga sabab bo‘lmoqda. Masalan, 2020-yili issiqlik energiyasi yo‘qotilishi 44 foizni, pulga chaqqanda, 630 milliard so‘mni tashkil etgan. Buning uchun 460 million kub metr tabiiy gaz, 55 million kub metr ichimlik suvi, 154 million kilovatt elektr energiyasi ortiqcha sarflangan. Oqibatda “Toshissiqquvvati” davlat unitar korxonasining kreditor qarzdorligi yuqoriligicha qolmoqda. Xizmat sifati pastligi aholining jiddiy e’tirozlariga sabab bo‘lmoqda.
Shu bois 2019-yil 2-dekabrda “Toshkent shahrining issiqlik ta’minoti tizimini yanada takomillashtirish chora-tadbirlari to‘g‘risida” Prezident qarori qabul qilinib, tizimda bozor tamoyillari va davlat-xususiy sheriklikni joriy etish bo‘yicha vazifalar belgilangan edi.
O‘tgan davrda bu borada loyiha konsepsiyasi tayyorlanib, takliflar olish uchun tanlov e’lon qilindi. Osiyo taraqqiyot bankining xulosasiga ko‘ra, Fransiyaning Veolia kompaniyasining loyihasi eng samarador deb topildi. Bu kompaniya Polsha, Chexiya, Ruminiya, Litva, Germaniyadagi shaharlarda issiqlik tizimini boshqarish tajribasiga ega.
Izoh (0)