Toshkentda voyaga yetmagan qizlar o‘rtasida sodir bo‘lgan janjal yuzasidan ma’lumot berildi

Toshkent shahar IIBB ijtimoiy tarmoqlarda tarqalgan bir nechta qizning o‘zaro janjali aks etgan video yuzasidan o‘tkazilgan tekshiruv natijasi bo‘yicha ma’lumot berdi.

Ijtimoiy tarmoqlarda voyaga yetmagan qizlarning janjali dahanaki mushtlashuvga aylanib ketgani tasvirlangan video tarqaldi.

Ma’lum qilinishicha, 28-sentabr kuni soat 17:30 larda 17 yoshli Sh.Ya. tanishlari bilan Chilonzor tumanidagi “Milliy” stadioni (sobiq “Bunyodkor”) oldidagi avtoturargohda uchrashib, voyaga yetmagan 2004-yilda tug‘ilgan R.B. uni ijtimoiy tarmoqlar orqali haqorat qilgani uchun munosabatlarni hal qilib olmoqchi bo‘lgan. Og‘zaki tortishuv o‘zaro janjalga aylanib ketgan va Sh.Ya. tanishi R.B.ni urgan.

“Hozirda mazkur holat yuzasidan Chilonzor tumani IIO FMB tomonidan tekshiruv o‘tkazilmoqda, yakuni bo‘yicha qonuniy qaror qabul qilinadi”, — deyiladi xabarda.

Poytaxt IIBB ota-onalarni voyaga yetmagan bolalarini tarbiyalash va ularga ta’lim berish borasidagi majburiyatlarini bajarmasa, Ma’muriy javobgarlik to‘g‘risidagi kodeksning 47-moddasiga (bolalarni tarbiyalash va ularga ta’lim berish borasidagi majburiyatlarni bajarmaslik) asosan ma’muriy javobgarlikka tortilishidan ogohlantirgan.

Avvalroq internetda Urganchda bir guruh ayollarning o‘zaro janjallashayotgani aks etgan video tarqalgan edi.