Moliya vazirligida Fransiyaning Veolia Environment kompaniyasining Markaziy va Sharqiy Yevropa bo‘yicha vitse-prezidenti Malika Genduri boshchiligidagi delegatsiya vakillari bilan uchrashuv bo‘lib o‘tdi. Bu haqda vazirlik matbuot xizmati xabar berdi.
Davlat-xususiy sheriklik doirasida Toshkent shahridagi issiqlik ta’minoti tizimini boshqaruvga topshirish bo‘yicha loyiha konsepsiyasi — muhokamalarning asosiy mavzusi bo‘lgan. Loyiha shahar issiqlik ta’minoti tizimini xalqaro texnik va ekologik standartlar darajasida modernizatsiya qilish va rivojlantirish, shuningdek, ishlab chiqarilgan va yetkazib berilgan energiya manbalarini hisobga olish uchun zamonaviy axborot tizimlarini joriy etishni ko‘zda tutadi.
Veolia Environment — Parijda joylashgan ko‘p tarmoqli kompaniya hisoblanadi. Suv ta’minoti, kommunal xizmatlar, energiya va transport xizmatlari kabi faoliyat yo‘nalishiga ixtisoslashgan. Kompaniya 160 yildan ortiq sanoat tajribasiga ega bo‘lgan resurslarni boshqarish tizimini optimallashtirish sohasidagi yetakchilardan biridir.
Uchrashuv so‘ngida Veolia Environment kompaniyasi loyihaning texnik-iqtisodiy asosini o‘z ichiga olgan bitim konsepsiyasini ko‘rib chiqish uchun O‘zbekiston Uy-joy kommunal xizmat ko‘rsatish vazirligi hamda Toshkent shahar hokimiyatiga taqdim etdi.
Izoh (0)