Россия Тергов қўмитасининг Кабарда-Болқория Республикаси бўйича бошқармаси Эльбрус тоғига сафар ташкилотчисини ҳибсга олганини маълум қилди. Сафар давомида Россиянинг турли ҳудудларидан келган беш нафар сайёҳ ҳалок бўлганди. Baza нашрининг аниқлик киритишича, қўлга олинган шахс — Пятигорск округидаги Elbrus.Guide компаниясининг эгаси ва катта йўлбошчиси санкт-петербурглик тадбиркор Денис Алимов. 27 сентябрь куни гумонланувчининг ўзи Кабарда-Болқория пойтахти Налчикда ҳибсга олинганини айтди.
«Алимов икки ойга ҳибсга олинди», — дея хабар берди «Интерфакс» Россия Тергов қўмитасининг Кабарда-Болқория бўйича бошқармасига таяниб.
Тергов қўмитаси маълумотларига кўра, сафар иштирокчиларининг вафотидан кейин бошланган жиноят иши юзасидан Алимов хавфсизлик талабларига жавоб бермайдиган хизматлар кўрсатиш бўйича сўроқ қилинган. Baza маълумотларига кўра, у тоғга чиқишни режалаштиришда гўёки ой ва об-ҳаво ҳисобида адашганини айтган. Тергов қўмитаси «сафар ташкилотчиси иқрорнома ёзиб мурожаат қилгани ва батафсил кўрсатмалар берганини» айтди, шундан сўнг терговчилар уни ҳибсга олишга қарор қилган. Тергов қўмитаси уни ҳибсга олиш учун судга ариза берган.
Эльбрусга чиқиш пайтида сайёҳлар ҳалок бўлгач, Денис Алимов биринчи жабрланган аёлни пастга тушириб кетган гиднинг гапларига асосланиб, журналистларга тоғда нима бўлганини батафсил айтиб берди. Тоғга уюштирилган сафарда 19 киши иштирок этган, улардан тўрт нафари профессионал альпинистлар бўлган. 23 сентябрга ўтар кечаси, Алимовнинг сўзларига кўра, гуруҳ Эльбрус биқинига қараб йўл олган. «Биз тун бўйи юрдик, чунки об-ҳаво яхши эди. Жуда зўр бўлмаса-да, у кейинги беш кун учун маъқул вариант эди», — деди у.
Гуруҳ Эльбрус биқинининг тепасида жойлашган яссиликка 23 сентябрь куни эрталаб соат 10 ларда етиб келди, Алимовнинг сўзларига кўра, бу «кеч» эди. У ерда сафар иштирокчиларидан бирининг мазаси қочган, шундан сўнг гидлар пастроқда аҳволи яхшиланишига умид қилиб, аёлни тоғ белига туширишга қарор қилган. Эрталаб соат 11 ларда гидлардан бири Игорь Данков ва аёл пастга тушишни бошлади. Бу вақтда об-ҳаво ёмонлашган: кучли шамол эсиб, кучли қор ёғган, бунинг натижасида атрофни кўриш даражаси ярим метрга тушиб кетган. Пастда турист аёлнинг аҳволи ёмонлашиб, у ҳушини йўқотган ва гиднинг қўлида вафот этган. «Гид унга нашатир ҳидлатган, чой ичирган. Аммо ҳеч нарса ёрдам бермаган», — деди Алимов.
Гид марҳум аёлнинг жасади ёнига белги қўйиб, сўнг бир неча соат давомида гуруҳнинг қайтишини кутган. Игорь Данков қутқарувчилар билан рация орқали боғланишга уринган, лекин фалокат сигнали қабул қилинмаган. Гид гуруҳ йўлдан адашган деб қарорга келиб, тоғдан туша бошлаган.
Алимов гиднинг ҳаракатларини тўғри деб атади. Кечқурун соат 5 ларда гид алоқага чиққан, у координатор билан боғланиб, гуруҳ йўқолгани ҳақида Фавқулодда вазиятлар вазирлигига хабар беришни сўраган.
Жабрланувчиларнинг сўзларига кўра, гуруҳнинг қолган аъзолари об-ҳаво ёмонлашганда тоғдан туша бошлаган: бўрон бошланиб, ҳаво ҳарорати -20 даражагача тушиб кетган ва шамол тезлиги секундига 40—70 метргача кўтарилган. Альпинистлар тўда бўлиб тушган, лекин тўсатдан сайёҳлардан бири йиқилиб, оёғини синдириб олган, бу эса ҳаракатланишни мураккаблаштирган. Алимовнинг айтишича, бу ҳалокатга сабаб бўлган: «Жароҳатланган оёқ текширилаётган пайтда қолган иштирокчилар музлай бошлаган». Тушиш пайтида икки киши ҳушидан кетиб, вафот этган. Уч гид гуруҳни уч қисмга ажратиб, пастга тушишни бошлаган. Гуруҳлардан бирида яна икки киши вафот этган, улар 3900 метр баландликдаги чанғи лифтига замбилда олиб кетилган. Қолган сайёҳлар Фавқулодда вазиятлар вазирлиги гидлари ёки қутқарувчилари билан пастга тушган.
Аввалроқ Тергов қўмитаси дастлабки маълумотларга асосланиб, сафарнинг беш иштирокчиси ўлимига қаттиқ совуқ уриши сабаб бўлганини айтганди. Тоғда қутқарилган яна 14 киши касалхонага ётқизилган. Сафарда қатнашган гидлар қаттиқ музлаб қолди, деди Денис Алимов. Унинг сўзларига кўра, икки гид ҳалиям касалхонада, қолган икки нафари уйига қайтган. «Уларга ҳали ҳеч қанақа айблов эълон қилинмаган», — деди у.
Маълумот учун: Альпинизмда «об-ҳаво ойнаси» деган атама бор, бу муссон ёмғирлари яқинлашиши олдидан тоққа чиқиш принципиал жиҳатдан мумкин бўладиган яхши об-ҳаволи кунлар.
Изоҳ (0)