O‘zbekistonda elektr energiyasi ishlab chiqarish hajmi 2020-yilga nisbatan oshdi

O‘zbekistonda 2021-yilning yanvar–avgust oylarida yirik korxonalar tomonidan 46 milliard kilovatt/soat elektr energiyasi ishlab chiqarildi. Bu haqda Davlat statistika qo‘mitasi ma’lum qildi.

Qayd etilishicha, bu o‘tgan yilning mos davriga nisbatan 3,8 milliard kilovatt/soatga ko‘p bo‘lib, o‘sish sur’ati 9 foizga teng bo‘ldi.

Jami elektr energiyasi ishlab chiqaruvchi korxonalar tomonidan respublika miqyosida ishlab chiqarilgan elektr energiyasining jami hajmida:

• Toshkent viloyati 23,1 foiz;
• Sirdaryo viloyati 22,7 foiz;
• Qashqadaryo viloyati 19,2 foiz;
• Navoiy viloyati 15,7 foiz ulushga ega.

O‘zbekistonda elektr energiyasiga bo‘lgan talab, mutaxassislarning fikriga ko‘ra, 2018-yildagi 61 milliard kilovatt/soatdan 2030-yilga kelib 100 milliard kilovatt/soatdan ortiqqacha o‘sishi kutilmoqda. Hozirda mamlakatda 250 ming kilometrdan ortiq elektr uzatish liniyalari va tarqatish tarmoqlari mavjud. Ularning aksariyati Sovet Ittifoqi davrida qurilgan va ularning ekspluatatsiya muddati ancha vaqt oldin tugagan. Shu sababli energiya infratuzilmasini modernizatsiya qilish uchun Jahon banki O‘zbekistonda elektroenergetikani rivojlantirish uchun 380 million dollar ajratdi.