Vashington sudi 1981-yilda AQShning 40-prezidenti Ronald Reyganga suiqasd uyushtirgan 66 yoshli kichik Jon Xinklidan 2022-yilning iyun oyida barcha sud cheklovlarini olib tashlashga qaror qildi. Buning uchun o‘sha vaqtga qadar kuzatuvlarda uning ruhiy holati barqaror deb topilishi kerak.
Ushbu masala bo‘yicha qarorni Kolumbiya okrugi federal sudyasi Pol Fridman shu haftada qabul qilmoqchi, deb xabar berdi Associated Press. 27-sentabr kuni bo‘lib o‘tgan tinglov chog‘ida sudya Xinklida 1983-yildan buyon hech qanday faol ruhiy noqislik alomatlari ko‘rinmagani, u o‘zini tajovuzkor tutmagani yoki qurolga qiziqmaganini ta’kidladi. Fridmanning fikricha, agar Xinkli o‘ldirishga uringan odam prezident bo‘lmaganida, u “ancha oldin” qo‘yib yuborilgan bo‘lardi.
AQSh hukumati dastlab Jon Xinkli ozod qilinishiga qarshi chiqdi, lekin mustaqil so‘rovnomadan so‘ng ular o‘z nuqtayi nazarini o‘zgartirdi. Endi ular Xinkli to‘qqiz oy davomida faol ruhiy nosog‘lomlik alomatlarini ko‘rsatmasa, jazodan butunlay ozod etilishi mumkin deb hisoblaydi. Ronald Reygan nomidagi prezident fondi, o‘z navbatida, Xinkli ozod qilinishiga qarshi bo‘lib, uning boshqalarga xavf tug‘dirishda davom etishini ta’kidlamoqda.
1981-yil 30-mart kuni kichik Jon Xinkli Vashingtondagi Hilton mehmonxonasi oldida AQShning 40-prezidenti Ronald Reyganga o‘q uzgan. Reygan o‘pkasidan yaralangan. Hodisada jami to‘rt kishi jabrlangan. Prezident matbuot kotibi Jeyms Breydi miyasidan jiddiy jarohat olib, 2014-yilda vafot etdi. Jon Xinklining aytishicha, u o‘zi sevib qolgan aktrisa Jodi Fosterni hayratda qoldirish uchun jinoyatga qo‘l urgan.
Xinkli ruhiy nosog‘lomligi tufayli qotillikka urinishda aybsiz deb topildi. U ruhiy kasalliklar shifoxonasiga yotqizilgan va u yerda 34 yil yashagan. 2000-yillarning boshida unga ota-onasi bilan uchrashishga ruxsat berildi, 2016-yilda esa u kasalxonadan chiqarildi va onasining Virjiniyadagi uyida yashash uchun ruxsat oldi.
Ozod qilinganidan keyin Jon Xinkliga qurol-yarog‘ga egalik qilish, spirtli ichimliklar ichish, matbuot bilan gaplashish, Reygan va Foster oilasi bilan bog‘lanish taqiqlandi. Agar uyidan 120 kilometr uzoqqa ketmoqchi bo‘lsa, u rasmiylarga xabar berishi kerak. Uning internetdagi hisoblari hukumat nazorati ostida.
Izoh (0)