Gvineyada sentabr boshida davlat to‘ntarishi uyushtirib hokimiyatni qo‘lga kiritgan va mamlakat prezidenti Alfa Kondeni qo‘lga olgan harbiylar o‘tish davri xartiyasini qabul qildi. Bu haqda tegishli hujjatga tayanib, “RBK” xabar berdi.
Xartiyaga ko‘ra, isyonchilar rahbari Mamadi Dumbuya mamlakat prezidentiga aylanadi. Hujjat, shuningdek, hukumat hamda 81 kishidan iborat Milliy o‘tish davri kengashi tuzilishini nazarda tutadi. Hukumatni fuqarolik bosh vaziri boshqaradi, unga va hukumat a’zolariga bo‘lajak saylovlarda mahalliy va milliy darajada qatnashish taqiqlanadi. Milliy o‘tish kengashini prezident va ikki vitse-prezident boshqaradi, ularga ham saylovda qatnashish taqiqlanadi. Bundan tashqari, kengashdagi kamida 30 foiz o‘rinlarni ayollar egallashi kerak.
5-sentabr kuni bir guruh harbiylar Gvineyada davlat to‘ntarishi uyushtirgandi. Qo‘zg‘olon rahbari Mamadi Dumbuya hukumatni tarqatib yuborib, chegaralar yopilgani, mamlakat konstitutsiyasiga amal qilish to‘xtatilgani va Gvineya prezidenti Alfa Konde hibsga olingani haqida e’lon qildi.
Dumbuya davlat to‘ntarishiga sabab sifatida Gvineyadagi ijtimoiy-siyosiy va iqtisodiy vaziyatning yomonligini keltirdi. “Respublika institutlarining, adolatni ta’minlashning sustligi, fuqarolar huquqlarining buzilishi, moliyaviy boshqaruvning samarasizligi respublika armiyasini Gvineya xalqi oldida javobgarlikni o‘ziga olishga majbur qildi”, — ta’kidladi isyon yetakchisi.
Birlashgan Millatlar Tashkiloti Bosh kotibi Antoniu Guterrish va Yevropa Ittifoqining tashqi ishlar bo‘yicha oliy vakili Josep Borrel Afrika mamlakatidagi to‘ntarishni qoralab, respublika rahbarini asirlikdan ozod qilishga chaqirdi.
Izoh (0)