O‘zbekistonda 2020-yilda Oliy Majlis Qonunchilik palatasi deputatlarining xizmat kvartiralarini ta’mirlashga 1,2 milliard so‘m sarflangan, deb xabar beradi “Anhor.uz”. 696 million so‘mlik birinchi shartnoma 27-aprel sanasi bilan, 550 million so‘mlik ikkinchi shartnoma esa 28-aprel sanasi bilan tuzilgan.
Davlat xaridlari portaliga joylashtirilgan birinchi shartnomada Toshkentning Yashnobod tumanida joylashgan to‘rtta kvartira, Mirobod tumanida joylashgan 21 ta kvartira haqida so‘z boradi. Ta’mirlash ishlarini yakunlash 2020-yil 15-mayga rejalashtirilgan.
Ta’mirlash ishlari bilan “Sarvar Komila Sifat qurilish” MChJ shug‘ullangan. Yuridik shaxslar reyestriga ko‘ra, ushbu kompaniyaning asosiy faoliyat turi — boshqa pardoz ishlari. Ustav jamg‘armasi — 463 million so‘m, muassis — Bekzod Karimov (100 foiz).
Ikkinchi shartnomada kvartiralar soni ko‘rsatilmagan, biroq ular Toshkentning Shayxontohur, Olmazor, Yunusobod, Uchtepa, Mirzo Ulug‘bek va Chilonzor tumanlarida joylashgani qayd etiladi. Ishlarning yakunlanishi 2020-yil 20-may sanasiga rejalashtirilgan.
Ta’mirlash ishlari bilan “Buyuk quruvchi” korxonasi shug‘ullangan. Korxona Toshkent viloyatida ro‘yxatga olingan, asosiy faoliyat turi – turar joylar qurilishi. Ustav jamg‘armasi – 6 million so‘m, muassis – Ravshan Rasulbekov.
Loyiha qaroriga ko‘ra, ushbu kvartiralarda shiftlar va devorlarni bo‘yash, metall eshiklar, eshik va deraza bloklarini o‘rnatish, pollarni linoleum bilan qoplash, devorlarni keramik plita bilan qoplash, santexnika va elektr montaj ishlari va hokazolarni amalga oshirish ko‘zda tutilgan.
Izoh (0)