Карантин жорий этилган 2020 йилда Олий Мажлис депутатлари хизмат квартираларини таъмирлашга 1,2 млрд сўм сарфланган

Ўзбекистонда 2020 йилда Олий Мажлис Қонунчилик палатаси депутатларининг хизмат квартираларини таъмирлашга 1,2 миллиард сўм сарфланган, деб хабар беради «Anhor.uz». 696 миллион сўмлик биринчи шартнома 27 апрель санаси билан, 550 миллион сўмлик иккинчи шартнома эса 28 апрель санаси билан тузилган.

Давлат харидлари порталига жойлаштирилган биринчи шартномада Тошкентнинг Яшнобод туманида жойлашган тўртта квартира, Миробод туманида жойлашган 21 та квартира ҳақида сўз боради. Таъмирлаш ишларини якунлаш 2020 йил 15 майга режалаштирилган.

Таъмирлаш ишлари билан «Сарвар Комила Сифат қурилиш» МЧЖ шуғулланган. Юридик шахслар реестрига кўра, ушбу компаниянинг асосий фаолият тури — бошқа пардоз ишлари. Устав жамғармаси — 463 миллион сўм, муассис — Бекзод Каримов (100 фоиз).

Иккинчи шартномада квартиралар сони кўрсатилмаган, бироқ улар Тошкентнинг Шайхонтоҳур, Олмазор, Юнусобод, Учтепа, Мирзо Улуғбек ва Чилонзор туманларида жойлашгани қайд этилади. Ишларнинг якунланиши 2020 йил 20 май санасига режалаштирилган.

Таъмирлаш ишлари билан «Буюк қурувчи» корхонаси шуғулланган. Корхона Тошкент вилоятида рўйхатга олинган, асосий фаолият тури – турар жойлар қурилиши. Устав жамғармаси – 6 миллион сўм, муассис – Равшан Расулбеков.

Лойиҳа қарорига кўра, ушбу квартираларда шифтлар ва деворларни бўяш, металл эшиклар, эшик ва дераза блокларини ўрнатиш, полларни линолеум билан қоплаш, деворларни керамик плита билан қоплаш, сантехника ва электр монтаж ишлари ва ҳоказоларни амалга ошириш кўзда тутилган.