O‘zbekiston Davlat bojxona qo‘mitasi 7,3 mlrd so‘mga 76 ta avtomobil sotib oldi

Davlat bojxona qo‘mitasi 7,3 milliard so‘mga (taxminan 700 ming dollar) UzAuto Motors tomonidan ishlab chiqilgan jami 76 ta avtomobil xarid qildi. Bunga “Davletovuz” Telegram-kanali e’tibor qaratdi. Davlat xaridlari portalida keltirilgan ma’lumotlarga ko‘ra, ushbu mablag‘ga 10 ta Lacetti/Gentra, 14 ta Cobalt, 52 ta turli pozitsiyadagi Nexia-3 sotib olingan.

Bojxona qo‘mitasi matbuot xizmati ushbu holat yuzasidan “Daryo”ga izoh sifatida ma’lum qilishicha, bojxona organlari zimmasiga yuklatilgan vazifalarni to‘laqonli bajarish, xususan, tovar va transport vositalarini bojxona hamrohligida kuzatib borish, kontrabandaga qarshi kurashishda texnik va transport ta’minoti muhim ahamiyat kasb etadi.

Bugungi kunda bojxona organlari avtoparkidagi mavjud xizmat avtotransport vositalarining 117 tasi 1991—2001-yillarda ishlab chiqarilgan. Amaldagi qonunchilik talablariga ko‘ra avtomashinalar uchun amortizatsiyaning yillik eng yuqori normasi 20 foiz (5 yil) belgilangan. Turli iqlim va yo‘l sharoitida 15 yildan ortiq muddatdan buyon foydalanib kelinayotgan ushbu avtomashinalarni soz holda saqlash uchun davlat budjeti mablag‘lari hisobidan salmoqli mablag‘lar sarflanishini taqozo etadi.

Hozirda bojxona organlari avtoparkidagi 15 yildan ortiq foydalanishda bo‘lgan ushbu avtomashinalarni zamonaviy va tejamkor avtomashinalar bilan yangilash maqsadida, Davlat bojxona qo‘mitasi maxsus fondi mablag‘lari hisobidan 7 milliard 351 million so‘mga jami 76 ta, shundan, 10 ta Lacetti Gentra, 14 ta Cobalt va 52 ta Nexia avtomashinalarni xarid qilish bo‘yicha chora-tadbirlar amalga oshirildi.

Xususan, O‘zbekiston davlat mustaqilligining 30 yilligi bayrami arafasida shartnoma doirasida xarid qilingan ushbu avtomashinalar maxsus jihozlangan holda hududiy bojxona boshqarmalari va olis hududlardagi bojxona postlari uchun xizmatda foydalanish maqsadida tarqatildi.

Shuningdek, hozirda foydalanish muddati tugagan hamda xarajatlari yuqoriligi sababli ta’mirlash ishlari maqsadga muvofiq bo‘lmagan avtomashinalarni hisobdan chiqarish va amaldagi qonunchilikda belgilangan tartibda “E-ijro auksion” elektron savdo maydonchasi orqali sotish choralari ko‘rilmoqda.