Sirdaryo viloyati Guliston shahrida xolasining seyfidagi pullarni qo‘lga kiritish maqsadida kelgan jiyan uning voyaga yetmagan o‘g‘lini pichoqlab o‘ldirdi. Bu haqda Sirdaryo viloyati sudining jinoyat ishlari bo‘yicha sudyasi Baxtiyor Mamadaminovga tayanib, “Sirdaryo xabarlari” xabar berdi.
Ma’lum qilinishicha, Gulistonda 26 yoshli B.X. qimorbozlikka berilib, internetda qimor o‘yinlari o‘ynab, oqibatda 100 million so‘mdan ortiq qarzga botgan. U xolasining xonadonida joylashgan seyf ichida taxminan 5 ming dollar borligini bilib qolib, uni bosqinchilik yo‘li bilan talon-toroj qilish maqsadida reja tuzib olgan.
2021-yil 18-mart kuni X.B. o‘zi bilan oshxona pichog‘ini olib, xolasining xonadoniga kelgan. Uyga uning 2003-yilda tug‘ilgan B.O. ismli o‘g‘lining ruxsati bilan kirgan. Yigit peshin namozi o‘qiyotganidan foydalanib, X.B. pichoq bilan jiyaniga hujum qilgan.
U yigitning ko‘krak qafasini old va orqa tomonlariga pichoq bilan 10 marta urgan, yuz qismini ko‘rpa bilan yopib qasddan o‘ldirayotgan vaqtida B.O.ning yordam so‘rab baqirganini eshitgan qo‘shnisi xonadonga kirib, sodir bo‘layotgan voqea guvohiga aylangan.
B.X. qo‘shni ayolga hujum qilmoqchi bo‘lganida, u “militsiya chaqirishini” aytib baqirgan va bundan qo‘rqib ketgan jinoyatchi voqea joyidan qochib ketgan.
Olingan tan jarohatlari oqibatida voyaga yetmagan B.O. 18-mart kuni shoshilinch tez yordam ilmiy markazi Sirdaryo viloyat filialida vafot etgan.
Jinoyat ishlari bo‘yicha Guliston shahar sudida 24-avgust kuni mazkur jinoyat ishi mazmunan ko‘rib chiqilib, X.B.ga Jinoyat kodeksining qator moddalariga ko‘ra 20 yil ozodlikdan mahrum qilish jazosi tayinlangan.
Avvalroq Navoiyda fuqaro kuyovini pichoqlab o‘ldirib qo‘ygani, Namanganda 19 yoshli yigit onasining norasmiy erini pichoqlagani, Andijonda aka o‘gay ukalarini chopib tashlagani to‘g‘risida xabar berilgandi.
Izoh (0)