Chirchiqda topib olgan noqonuniy quroli haqida ichki ishlar organlariga xabar bermagan 26 yoshli yigitga jinoyat ishi ochildi

Toshkent viloyati Chirchiq shahrida o‘qotar qurolni noqonuniy ravishda saqlab kelgan shaxs aniqlandi, deb xabar beradi viloyati IIBB axborot xizmati.

Ma’lum qilinishicha, 13-sentabr kuni Chirchiq shahrida xizmat olib borayotgan viloyat IIBB 1-mintaqaviy markaz PPX va YPX xodimlari tomonidan shaharda joylashgan metall qabul qilish shoxobchasida ishlovchi 26 yoshli B.A. o‘qotar qurolni topib olib (o‘z vaqtida IIO xabar bermagan), noqonuniy ravishda saqlab yurgani aniqlangan.

Qurol eski g‘isht uyumlari orasidan topilgan va xolislar ishtirokida daliliy ashyo sifatida rasmiylashtirilib olingan.

O‘tkazilgan sudga oid ballistik ekspertizaning xulosasiga ko‘ra, mazkur qurol 1943-yilda zavod usulida tayyorlangan, 7,62 millimetrli o‘q otish uchun mo‘ljallangan TT (Tulskiy Tokarev) to‘pponchasi ekanligi hamda narezli jangovar qurollar turkumiga kirishi aniqlangan.

Mazkur holat yuzasidan Chirchiq shahar IIB huzuridagi Tergov bo‘limi tomonidan Jinoyat kodeksining 248-moddasi (qurol, o‘q-dorilar, portlovchi moddalar yoki portlatish qurilmalariga qonunga xilof ravishda egalik qilish) 1-qismi bilan jinoyat ishi qo‘zg‘atilgan va tergov harakatlari olib borilmoqda.

Avvalroq Toshkentda o‘qotar qurol saqlagan shaxs aniqlanib, qamoqqa olingani, Toshkentda o‘qotar qurolni 2 ming dollarga sotmoqchi bo‘lgan yigitlar ushlangani to‘g‘risida xabar berilgandi.