Чирчиқда топиб олган ноқонуний қуроли ҳақида ички ишлар органларига хабар бермаган 26 ёшли йигитга жиноят иши очилди

Тошкент вилояти Чирчиқ шаҳрида ўқотар қуролни ноқонуний равишда сақлаб келган шахс аниқланди, деб хабар беради вилояти ИИББ ахборот хизмати.

Маълум қилинишича, 13 сентябрь куни Чирчиқ шаҳрида хизмат олиб бораётган вилоят ИИББ 1-минтақавий марказ ППХ ва ЙПХ ходимлари томонидан шаҳарда жойлашган металл қабул қилиш шохобчасида ишловчи 26 ёшли Б.А. ўқотар қуролни топиб олиб (ўз вақтида ИИО хабар бермаган), ноқонуний равишда сақлаб юргани аниқланган.

Қурол эски ғишт уюмлари орасидан топилган ва холислар иштирокида далилий ашё сифатида расмийлаштирилиб олинган.

Ўтказилган судга оид баллистик экспертизанинг хулосасига кўра, мазкур қурол 1943 йилда завод усулида тайёрланган, 7,62 миллиметрли ўқ отиш учун мўлжалланган ТТ (Тульский Токарев) тўппончаси эканлиги ҳамда нарезли жанговар қуроллар туркумига кириши аниқланган.

Мазкур ҳолат юзасидан Чирчиқ шаҳар ИИБ ҳузуридаги Тергов бўлими томонидан Жиноят кодексининг 248-моддаси (қурол, ўқ-дорилар, портловчи моддалар ёки портлатиш қурилмаларига қонунга хилоф равишда эгалик қилиш) 1-қисми билан жиноят иши қўзғатилган ва тергов ҳаракатлари олиб борилмоқда.

Аввалроқ Тошкентда ўқотар қурол сақлаган шахс аниқланиб, қамоққа олингани, Тошкентда ўқотар қуролни 2 минг долларга сотмоқчи бўлган йигитлар ушлангани тўғрисида хабар берилганди.