Xorazmlik fuqaro o‘z xonadonida iste’molga yaroqsiz 230 kilogramm go‘sht mahsulotlarini saqlab kelgani aniqlandi, deb xabar beradi Veterinariya va chorvachilikni rivojlantirish davlat qo‘mitasi matbuot xizmati.
Ma’lum qilinishicha, Davlat veterinariya xizmatining IIB Karantin bo‘limi xodimlari bilan hamkorlikdagi reyd tadbirlari o‘tkazilmoqda. Oziq-ovqat mahsulotlari xavfsizligini ta’minlash maqsadida o‘tkazilayotgan tadbir doirasida Xorazm viloyatining Xonqa tumanida yashovchi fuqaroning xonadoni ko‘zdan kechirilgan.
Tekshiruvlar davomida fuqaro kelib chiqishi noma’lum bo‘lgan jami 230 kilogramm iste’molga yaroqsiz qoramol go‘shtini saqlab kelayotgani ma’lum bo‘lgan.
Ushbu go‘sht mahsulotlari eskirgan deya topilib, belgilangan tartibda yo‘q qilingan.
Avvalroq Qashqadaryoda Toshkentga olib ketilayotgan iste’molga yaroqsiz 200 kg go‘sht aniqlangani, Toshkent viloyatidagi dehqon bozorida iste’molga yaroqsiz 140 kg go‘sht va 30 litr sut yo‘q qilingani, Buxorodan Toshkentga kelib chiqishi noma’lum bo‘lgan 900 kg go‘sht olib ketilayotgani aniqlangani to‘g‘risida xabar berilgandi.
Izoh (0)