O‘zbekiston Oliy Majlis Senati kengashining 19-yalpi majlisi bo‘lib o‘tmoqda. Majlisda Senat raisi Tanzila Norboyeva davlat budjetining 2021-yil birinchi yarim yillik yakunlari bo‘yicha mulohazalarini bildirdi, deb xabar beradi parlament yuqori palatasi matbuot xizmati.
Tanzila Norboyevaning ta’kidlashicha, mahalliy budjetlarda shakllangan qo‘shimcha manbalardan foydalanishda qator kamchiliklarga yo‘l qo‘yilmoqda.
“Ushbu mablag‘larni ishlatishda mahalliy kengashlar hal qiluvchi vazifani bajaradi. Biroq ular bunga talab darajasida qaramayapti. Birgina Qashqadaryo viloyatining G‘uzor, Mirishkor, Kasbi, Chiroqchi tumanlari va Qarshi shahrida mahalliy kengashlarda muhokama qilinmasdan, deputatlarning ruxsatisiz 10 millard so‘mga yaqin mablag‘ ishlatib yuborilgan.
Umuman, bunday holatlarni boshqa hududlar misolida ham keltirish mumkin. Mahalliy kengashlar qonun bilan o‘ziga berilgan vakolatni chuqur anglab, amalda samarali foydalangan holda talabchanlikni oshirmas ekan bu kabi muammolar kamaymaydi. Shu jihatdan, mahalliy Kengashlar vakillari, ayniqsa, budjet bo‘yicha doimiy komissiya a’zolari, shu jumladan, kotibiyatlar bu borada mas’uliyatni oshirishlari lozim”, — deydi Senat raisi.
Eslatib o‘tamiz, Oliy Majlis Senatining o‘n birinchi yalpi majlisida Tanzila Norboyeva hokimlarning sarflab bo‘lingan budjet hisobotini tasdiqqa olib kirishi noto‘g‘riligi va bunga mahalliy kengashlar yo‘l qo‘ymasligi kerakligini ta’kidlab o‘tgan edi.
Izoh (0)