Жонс Ҳопкинс университети маълумотларига кўра, дунёда коронавирусга чалинганлар сони 232 800 601 кишига етди, шуларнинг 4 765 604 нафари вафот этган. Шунингдек, жаҳон бўйича 6,152 миллиарддан ортиқ дозада коронавирусга қарши вакциналар қўлланилган.
Касалланганлар сони бўйича АҚШ (43,2 миллион), Ҳиндистон (33,7 миллион), Бразилия (21,3 миллион), Буюк Британия (7,7 миллион) ва Россия (7,3 миллион) энг олдинда бормоқда.
Байден коронавирусга қарши вакцинанинг учинчи дозасини олди
АҚШ президенти Жо Байден коронавирусга қарши вакцинанинг учинчи — бустер дозасини олди. Вакцинация жараёни Байденнинг Twitter’даги саҳифаси орқали бевосита трансляция қилинди.«Ҳозир мен COVID-19 га қарши бустер уколни оламан ва кимга тавсия этилган бўлса, барчани худди шундай қилишга даъват этаман», — деб ёзди 78 ёшли АҚШ президенти эмланишдан аввал.
Шунингдек, Байден ўз мурожаатида қайд этишича, Pfizer вакцинаси билан тўлиқ эмланган америкаликларнинг кўпчилиги ярим йилдан кейин у каби қайта эмланиши мумкин. Хусусан, ушбу тавсия семизлик ва диабет каби сурункали касалликлари бўлган 18 ёшдан ошган фуқароларга (шу жумладан, 64 ёшдан катталарга) ҳамда тиббиёт ходимлари, ўқитувчилар ва сотувчилар каби одамлар билан энг кўп мулоқот қилувчиларга тегишлидир. Ушбу гуруҳ 60 миллион америкаликни ўз ичига олади, деди Байден.
Туркманистонга фақат эмланган хорижликлар киритилади
Туркманистон Касалликлар тарқалишига қарши кураш бўйича фавқулодда комиссияси қарорига мувофиқ, мамлакат ҳудудига кираётган барча чет элликлар қуйидаги ҳужжатларни тақдим этиши керак:- ПЗР-тестдан ўтганлик ҳақида маълумотнома (амал қилиш муддати 72 соат);
- COVID-19 га қарши тўлиқ эмлангани ҳақидаги сертификат ёки коронавирусга қарши антитаналар борлиги ҳақида маълумотнома (IgM, IgG).
Ушбу янгилик 28 сентябрь куни Россиянинг Ашхободдаги элчихонаси сайтига жойлаштирилган. Давлат ахборот агентлиги комиссия мажлиси ҳақида хабар бермаган. 26 сентябрдан бошлаб мамлакатда Туркманистон мустақиллигининг 30 йиллигига бағишланган оммавий тантаналар бўлиб ўтмоқда.
Мавзуга доир: Туркманистон фуқаролари ЖССТга мурожаат қилиб, ҳукуматга коронавирусни тан олдиришни сўради
Россияда COVID-19 га қарши янги вакцина синовлари бошланди
Россияда коронавирусга қарши янги вакцина — «Бетувакс-Ков-2» синовлари бошланди.Дори воситалари давлат реестри маълумотларига кўра, Россияда ушбу вакцинани клиник синовлардан ўтказишга 27 сентябрь куни рухсат берилган. У коронавирус «профилактикаси учун рекомбинант вакцина»дир.
Вакцина Москвадаги «Бетувакс» МЧЖ экспертлари томонидан ишлаб чиқилган. Янги тиббиёт технологиялари институти суспензия ишлаб чиқарувчисига айланди.
«Бетувакс» клиник синовларининг биринчи ва иккинчи босқичлари 2022 йил августи охиригача давом этиши тахмин қилинмоқда. Тадқиқотларда 170 киши қатнашади. Синовлардан мақсад «Бетувакс-ков-2»ни вояга етган соғлом кўнгиллиларда хавфсизлик, қабул қилиниши ва иммунитет ҳосил қилиши нуқтаи назаридан текширишдан иборат.
Шу пайтгача Россияда коронавирусга қарши бешта вакцина рўйхатга олинган, булар — «Спутник V» ва «Спутник Лайт», «ЭпиВакКорона» ва «ЭпиВакКорона-Н» ҳамда «КовиВак» препаратлари.
COVID-19 пандемияси қачон тугайди?
Коронавирус пандемияси яқин келажакда ўз ниҳоясига етмайди. Маълум бир ҳолатларда касалланиш даражаси пасайиб, вирус мавсумий бўлиб қолса-да, у йўқолиб кетиши эҳтимолдан йироқ. Бу ҳақда «Роспотребнадзор» Эпидемиология марказий институти шифокорлари Эдуард Шунков ва Вадим Покровский маълум қилди.Олимлар мутация салоҳияти юқори бўлган вирус штаммлари тарқалиш чоғида ўзини қандай тутишини тушуниб олганидан кейин пандемия тугайдиган аниқ муддатни айтиш мумкин бўлади, деди Шунков. Унинг таъкидлашича, нормал ҳаётга қайтиш бўйича аниқ бир муддатларни айтиш мумкин эмас, чунки пандемиянинг кечишига нафақат штаммларнинг ўзгарувчанлиги, балки одамларнинг жамиятдаги хулқи, шунингдек, вакцинациянинг самарадорлиги ҳам таъсир қилади.
«Кўриб турибмизки, COVID-19 аллақачон икки йилдан буён биз билан бирга. У рақобатга дош бера олмасдан, касалланиш бўйича бошқа ЎРВИларга нисбатан яна биринчи ўринни олиши эҳтимоли ҳам катта», — деди эксперт.
Шунковнинг қўшимча қилишича, коронавируснинг кучсизроқ штаммлари пайдо бўлиши шунга олиб келиши мумкинки, инфекция бошқа ЎРВИлар билан рақобатлаша олмай қолади ва популяциядан йўқолиб кетади. Аммо COVID-19 бутунлай йўқолиб кетмасдан, балки унинг ўлим даражаси ва оғир кечиш ҳолатлари камайиши эҳтимолга яқинроқдир, деди у.
Бир неча йиллар давомида коронавирусга гриппга ўхшаб мавсумий характерга эга бўлади ва баъзи мамлакатларда вақти-вақти билан эпидемия бўлиб туради, дея унинг фикрига қўшилди Покровский. Бу вакцинациянинг ҳимоя эффектининг қанча давом этишига боғлиқ, дея қўшимча қилди у. Шунингдек, унинг тахминига кўра, иммунитети пасайган одамлар кузда касалланади, баҳорга келиб эса касалланиш даражаси пасаяди.
Мавзуга доир: COVID-19 мавсумий шамоллашга айланиб қолади, Эронда коронавирусдан ўлимлар бўйича рекорд қайд этилди. Коронахабарлар
- Японияда коронавирус пандемияси сабабли киритилган фавқулодда вазият режими 1 октябрдан бекор қилинади. Чекловлар аста-секинлик билан олиб ташланади, шунингдек, мамлакатда COVID-19 га қарши курашиш учун кўпроқ вақтинчалик даволаш муассасалари очилади ҳамда аҳолини эмлаш давом эттирилади. Фавқулодда вазият режими олти ойдан кўпроқ давом этди. Айни пайтда у мамлакатнинг 47 та префектурасидан 19 тасида амал қилмоқда.
- АҚШда жойлашган Pfizer фармацевтика компанияси COVID-19 га чалинган одам билан бевосита мулоқот қилинган ҳолатда вирусни юқтиришнинг олдини олиш учун мўлжалланган ичиладиган антивирус дорисини кенг синовдан ўтказиш босқичи бошланганини эълон қилди. У «Ритонавир» дорисининг кичик дозаси билан биргаликда қабул қилинади.
- Иордания валиаҳд шаҳзодаси Ал Ҳусайн ибн Абдулла коронавирусга топширган тести мусбат натижа берди, шу сабабли Иордания қироли Абдулла II ва унинг рафиқаси қиролича Рания карантинга жойлаштирилди. Мамлакатда эмланганлар учун яккаланиш режими беш кунни ташкил этади, қирол ва қиролича эса коронавирусга қарши вакцина олган.
Изоҳ (0)