Moskva markazidagi Pushkin maydonida KPRF (Rossiya Federatsiyasi kommunistik partiyasi) tomonidan uyushtirilgan “Halol saylovlar tarafdorimiz” shiori ostidagi aksiya bo‘lib o‘tdi. Meduza muxbiriga ko‘ra, unda mingga yaqin odam qatnashgan. Politsiya hisob-kitoblariga ko‘ra, namoyishga 400 ga yaqin odam chiqqan. Moskva meriyasi mitingga ruxsat berishdan bosh tortdi, shundan keyin KPRF uni saylovchilar bilan uchrashuv shaklida o‘tkazishga qaror qildi. Maydonda politsiya karnaylar orqali odamlarni ijtimoiy masofani saqlashga chaqirdi va aksiya noqonuniy tashkil etilganini ma’lum qildi.
Miting ishtirokchilari siyosiy mahbuslarni ozod qilishni talab qilib “Qo‘yib yubor!” deb hamda Moskvada elektron ovoz berish natijalari bekor qilinishini so‘rab “Bekor qil!” deya baralla shior aytdi. Shuningdek, yig‘ilganlar “ ‘Yagona Rossiya’ mandatlarni o‘g‘irladi!” deb qichqirib, saylovlarni tan olmasliklarini ma’lum qildi.
Namoyishchilarning ovozini bosish uchun politsiyachilar turli vatanparvarlik qo‘shiqlarini baland qilib qo‘ydi.
KPRF yetakchisi Gennadiy Zyuganov Davlat dumasida Vladimir Putin bilan bo‘lib o‘tgan partiyalar yetakchilari bilan uchrashuvda qatnashgani tufayli, aksiyaga kelmadi. Davlat dumasi deputati Vladimir Kashin barcha yig‘ilganlarga Zyuganovning salomini yetkazdi. Mitingga Davlat dumasining bir nechta deputatlari, deputatlikka nomzodlar hamda Moskva davlat dumasi deputati keldi. Aksiya boshlanganidan keyin taxminan bir soat o‘tib, namoyishchilar tarqala boshladi.
25-sentabr kuni KPRF Rossiyaning boshqa shaharlarida ham norozilik aksiyalarini o‘tkazdi. Xususan, Ufadagi mahalliy gayd-parkka qariyb 50 kishi to‘plandi, “Ular bizdan saylovlarni tortib oldi” degan plakat ko‘targan bir kishi qo‘lga olindi. Yekaterinburgda taxminan 200 kishi, Ulan-Udeda esa 30—40 kishi namoyishga chiqdi.
Moskvadagi KPRF mitingidan avvalroq politsiyachilar partiyaning ba’zi vakillarini, ularning o‘zlari ta’riflaganidek, “qamal qilgan”.
Bir kecha-kunduzda politsiyachilar Moskvada KPRFning 60 ga yaqin vakillarini qo‘lga olgan. Shuningdek, politsiya 20-sentabrdagi KPRF mitingi ishtirokchilarining 30 ga yaqinini javobgarlikka tortgan. 25-sentabr kuni Pushkin maydonidagi aksiyani tashkillashtirgani uchun “So‘l front” koordinatori Sergey Udalsov 10 sutkaga hibsga olingan.
Eslatib o‘tamiz, 19-sentabr kuni bo‘lib o‘tgan Rossiya Davlat dumasiga saylovlarda “Yagona Rossiya” (“Yedinaya Rossiya”) partiyasi ovozlarning 49,82 foizini to‘plab, yetakchi bo‘ldi. Yana to‘rtta partiya — Rossiya Federatsiyasi Kommunistik partiyasi (KPRF), Liberal-demokratik partiya (LDPR), “Adolatli Rossiya — haqiqat tomonida” (“Spravedlivaya Rossiya — za pravdu”) va “Yangi odamlar” (“Noviye lyudi”) Davlat dumasiga kirish uchun zarur bo‘lgan besh foizlik to‘siqdan o‘tdi. Xususan, KPRF 18,93 foiz ovoz to‘plab, 9 ta mandatni qo‘lga kiritdi.
Rossiyadagi saylovlarning borishini Yevroittifoq, Buyuk Britaniya va AQSh tanqid qildi. Xususan, Yevroittifoq vakili Jozep Borrel Rossiyada saylovchilarga o‘z huquqlarini amalga oshirish imkoniyati berilmaganini qayd etdi. Uning ta’kidlashicha, saylovlar arafasida muxolifatchi siyosatchilar, fuqarolik jamiyati tashkilotlari, mustaqil OAVlar hamda jurnalistlarga qarshi bosim kuchaygan. Buyuk Britaniya Tashqi ishlar vazirligi Rossiya saylovlarni monitoring qilish jarayoniga nisbatan kiritgan asossiz cheklovlardan hafsalasi pir bo‘lganini bildirdi. AQSh Davlat departamenti saylovlarda xalqaro majburiyatlarga amal qilinmaganini ta’kidladi.
Izoh (0)