95 foizgacha kuzatiladigan ikkinchi darajali qandli diabetda organizm insulinni samarali ishlata olmaydi. Hujayralar insulinga nisbatan sezuvchanligini yo‘qotadi. Natijada qondagi shakar miqdori (glyukoza) ko‘tariladi. Bu esa o‘z navbatida buyraklar, asablar, yurak, qon tomirlar va ko‘z bilan bog‘liq muammo kuzatilishiga sabab bo‘ladi. Ortiqcha vazn, kam harakatlilik, shuningdek, nasliy moyilligi borlarda kasallikning kelib chiqish xavfi yuqori bo‘ladi. Bemorlar ko‘pincha e’tibor bermaydigan va hatto shifokorlar e’tiboridan ham chetda qoladigan qandli diabetga xos alomatlar haqida ma’lumot berib o‘tamiz.
Milklarning yallig‘lanishi
2017-yil BMJ Open Diabetes Research & Care jurnalida e’lon qilingan tadqiqotda aniqlanishicha, milklarning yallig‘lanishi ikkinchi darajali qandli diabetga xos, hammaga ham ma’lum bo‘lmagan, ammo yetarlicha keng tarqalgan alomat hisoblanadi. Milkida yallig‘lanish hamda qonash kuzatilgan bemorlarda aksariyat hollarda qandli diabet, shuningdek, diabetdan avvalgi holatlar aniqlangan. Milkda og‘riq, qonash va yaralar kuzatilganda endokrinologga borish yoki qandli diabetga qon topshirish tavsiya qilinadi.
Pigment dog‘larning paydo bo‘lishi
Qandli diabeti bor bemorlarda shifokorlar ko‘pincha teri rangining o‘zgargani va to‘q bo‘lib qolganini payqadi. Qora akantoz deb nomlanadigan o‘zgarishlar qo‘ltiq osti sohasi, bo‘yin va tananing boshqa qismlarida kuzatilishi mumkin. Aksariyat hollarda ularning paydo bo‘lishi hujayralarning insulinga sezuvchanligi yo‘qolishi sabab bo‘ladi. Akantozning paydo bo‘lishi hamisha ham ikkinchi darajali qandli diabetga xos bo‘lavermaydi. Bunga polikistoz yoki qalqonsimon bez faoliyati bilan bog‘liq muammolar ham sabab bo‘lishi mumkin.
Oyoqning sanchib og‘rishi
Oyoqning sanchib og‘rishi ham ba’zida ikkinchi darajali qandli diabet bilan bog‘liq bo‘ladi. Qo‘l va oyoqlardagi nervlarning shikastlanishi mazkur kasallik jadallashishiga xos oqibatlardan sanaladi. Oqibatda qo‘l va oyoqdagi sezuvchanlik bilan bog‘liq muammo kuzatiladi. Og‘riq kuzatilishi, uvushib qolish singari alomatlarning doimiy ravishda kuzatilishi shifokorga borishga jiddiy sabab bo‘la oladi. Bu nafaqat qandli diabet, balki parishonxotir sklerozdan ham darak berishi mumkin.
Kun davomida uyqu bosishi
100 minglab ishtirokchilarni kuzatgan olimlar ikkinchi darajali qandli diabet singari surunkali kasalliklar kuchli charchoqni keltirib chiqarishini aniqlagan. Kasallik odamni shunchalik holdan toydirganidan, kun davomida uyqu bosishi kuzatiladi. Qolaversa, haddan ortiq lohaslik va kun davomida mizg‘ib olish istagining paydo bo‘lishi uyqu deprivatsiyasi — xurrak otish yoki apnoye bilan ham bog‘liq bo‘lishi mumkin. Ma’lum bo‘lishicha, apnoye ikkinchi darajali qandli diabetning paydo bo‘lish xavfini orttiradi. Umuman olganda doimiy ravishda faol bo‘lib turib birdaniga bo‘shashib, holsiz his qilish va uyqu bosishi kuzatilganda ikkilanib o‘tirmasdan darhol shifokorga murojaat qilish kerak.
Ko‘rishning xiralashishi va eshitish bilan bog‘liq muammo
Ko‘rish qobiliyati bilan bog‘liq muammolar, qandli diabetda kuzatiladigan nervlarning shikastlanishi sabab kuzatiladi. Agar vaqtida zarur choralar ko‘rilmasa, muammo jiddiylashib odam ko‘r bo‘lib qolishi mumkin. Agar sizda ham bunday muammo kuzatilayotgan bo‘lsa nafaqat ko‘z shifokori, balki moddalar almashinuvini tekshiradigan mutaxassisga ham murojaat qilish kerak. Ikkinchi darajali qandli diabet nafaqat ko‘rish, balki eshitish bilan bog‘liq muammolar kuzatilishiga ham sabab bo‘lishi mumkin. Qand miqdorining doimiy ko‘tarilishi eshitishga javob beradigan nervlarni ham shikastlanishiga sabab bo‘ladi. Bu va boshqa muammolar kuzatilganda befarq bo‘lmang, shifokorga borib tekshirtiring.
Izoh (0)