Ispaniyaning Atlantika okeanida joylashgan va Kanar arxipelagi tarkibiga kiruvchi Palma orolida 19-sentabr kuni Kumbre-Vyexa vulqoni otilishni boshlagandi. Natijada 24-sentabr kuni oroldagi Tajuye, Takande-de Abaxo va Takanda-de-Arriba shaharlaridan 1000 ga yaqin aholini evakuatsiya qilishga to‘g‘ri keldi.
Hozircha jabrlanganlar haqida ma’lumot yo‘q. Oroldagi aeroportga kiruvchi va chiquvchi reyslar bekor qilindi. Kumbre-Vyexa vulqonining faolligi 24-sentabr kuni kuchaygan.
Ispaniya bosh vaziri Pedro Sanchez hozirgi vaziyat tufayli Nyu-Yorkka rejalashtirgan safarini kechiktirdi va orolga yetib keldi. Sanchezning ma’lum qilishicha, Vazirlar Mahkamasi kelasi hafta orolni “falokat zonasi” deb e’lon qiladi.
Avvalroq Kanar arxipelagi tarkibiga kiruvchi Palma orolida vulqon otilishi uch oy davom etishi mumkinligi haqida xabar berilgandi. Palma oroli hukumati 20-sentabr kuni 5 ming aholini evakuatsiya qilishga majbur bo‘lgan. Lava aholining uylarigacha yetib borgan va bir qancha yo‘llarni o‘tishga imkonsiz qilib qo‘ygan.
85 mingga yaqin aholi yashaydigan orolda vulqon otilishidan oldin, taxminan, bir hafta mobaynida seysmik faollikning oshishi kuzatilgan.
Lava harakatining tezligi, taxminan, 700 metr/soatni tashkil qilmoqda. U allaqachon o‘nlab uylarni vayron qilgan. Europa Press agentligi 100 ta uy vayron bo‘lgani haqida yozdi.
Qayd etilsihicha, vulqon otilishidan chiqqan lava dengiz tomon harakatlanmoqda. “Katta moddiy zarar bo‘ladi. Umid qilamizki, hech kim jabr ko‘rmaydi”, — dedi Kanar orollari prezidenti Anxel Viktor Torres. U, shuningdek, qayta vulqon otilishi kutilmayotganini qo‘shimcha qildi. Orolda bungacha so‘nggi marta 1971-yilda Tenegiya vulqoni otilgan.
Izoh (0)