19-sentabr kuni Ispaniyaning Atlantika okeanidagi Kanar arxipelagi tarkibiga kiruvchi Palma orolida Kumbre-Vyexa vulqon tizmasi otilishni boshladi. Ushbu vulqonlar zanjiri so‘nggi marta 1971-yilda otilgan.

Palma orolidagi Kumbre-Vyexa milliy bog‘ida vulqon otilishidan keyingi lava va tutun. 19-sentabr, 2021-yil

Foto: Reuters

Vulqonda yangi otilish seysmik faollik oshganidan keyin yuz bergan — 11-sentabrdan keyin bu hududda bir hafta mobaynida 22 mingta yerosti silkinishi qayd etilgan. Vulqon otilishidan  oldin 3,8 magnitudali zilzila sodir bo‘lgan. Tabiiy ofat joyidan olingan videolavhalarda vulqondan osmonga lavalar, kul va toshlar otilganini ko‘rish mumkin. Lava oqimlaridan biri yonbag‘irdagi eng yaqin uylar tomon oqqan. Palma orolidan olingan lavhalarni mahalliy RTVC telekanali efirga uzatmoqda.

Foto: Getty Images

Vulqon otilishidan biroz oldinroq yaqin atrofdagi qishloqlar aholisini evakuatsiya qilish boshlangan, bu hududdan jami mingga yaqin odam evakuatsiya qilinishi kerak. Uy hayvonlari ham evakuatsiya qilinmoqda. Ispaniya Mudofaa vazirining so‘zlariga ko‘ra, evakuatsiyani amalga oshirishda harbiylar yordam bergan.

Vulqonshunos Stavros Meletidesning Reuters agentligiga aytishicha, vulqon yonbag‘rida beshta yoriq paydo bo‘lgan, ayni paytda hech kim uning qancha davom etishini ayta olmaydi. Hozircha qurbonlar haqida hech qanday ma’lumot yo‘q, lekin orol ma’murlari bir nechta yo‘llar shikastlangani haqida xabar bergan.

Foto: Getty Images

Foto: EPA

Foto: Reuters