Kanada sudi Xitoyning Huawei kompaniyasi moliyaviy direktori Men Vanchjou AQShdagi tergov bilan bitim tuzganidan so‘ng uni ozod qilish to‘g‘risida qaror chiqardi. Vanchjouning Kanadani tark etishiga ruxsat berildi, deb yozadi “RIA Novosti”.
AQShda Eronga qarshi sanksiyalarni buzish bilan bog‘liq firibgarlikda ayblangan Men Vanchjou 2018-yilning dekabrida AQSh talabiga binoan Kanadada hibsga olingandi. Keyinchalik u 10 million Kanada dollari (8 million AQSh dollari) miqdoridagi garov puli evaziga, GPS bilaguzugini taqish va unga biriktirilgan qo‘riqchilarga o‘zi haq to‘lash majburiyati bilan uy qamog‘iga joylashtirilgan.
Men xonim Eronga qarshi sanksiyalarning buzilishini yashirganlik bo‘yicha aybini qisman tan oldi, AQSh prokuraturasi esa uni Kanadadan ekstraditsiya qilish haqidagi so‘rovni qaytarib oldi.
Kanadaning Britaniya Kolumbiyasi provinsiyasi Oliy sudi Menni uy qamog‘idan ozod qilish to‘g‘risida buyruq chiqardi va unga nisbatan olib borilayotgan ishni to‘xtatdi. So‘ng Kanada Adliya vazirligi Huawei direktori mamlakatni tark etishi mumkinligini, chunki “ekstraditsiya jarayonlarini davom ettirish uchun hech qanday asos yo‘q” ekanini e’lon qildi.
CTV National News telekompaniyasi xabariga ko‘ra, Men Vanchjou qamoqdan ozod qilinganidan keyin Kanadani tark etib, Xitoyga uchib ketdi.
2018-yilda Men Vanchjou hibsga olingandan so‘ng ushbu harakat siyosiy ekani borasida Kanada va Xitoy o‘rtasida bahs boshlangandi. O‘sha yilning dekabr oyida Xitoy hukumati tomonidan josuslikda ayblangan ikki kanadalik Maykl Kovrig va Maykl Speyvor hibsga olindi. Kanada rasmiylari buni Huawei moliyaviy direktorining hibsga olinishiga javob deb gumon qildi. Speyvorga 11 yilga ozodlikdan mahrum etish, mol-mulkini musodara qilish, o‘zini esa deportatsiya qilish jazolari tayinlangan. Kovrigga qanday hukm o‘qilgani noma’lum.
Men Vanchjou ozod qilinganidan so‘ng bir vaqtning o‘zida Xitoyda hibsda bo‘lgan ikki kanadalik ham qamoqdan chiqarildi. Kanada bosh vaziri Jastin Tryudoning ma’lum qilishicha, ular uyiga qaytmoqda.
AQSh ma’muriyati XXR hukumatining kanadaliklarni ozod qilish haqidagi qarorini olqishladi. “AQSh hukumati va xalqaro hamjamiyat XXR hukumatining Kanada fuqarolari Maykl Kovrig va Maykl Speyvorni ikki yarim yil asossiz hibsda ushlab turgandan so‘ng ozod qilish haqidagi qarorini olqishlamoqda. Biz ularning Kanadaga qaytayotganidan xursandmiz”, — dedi AQSh davlat kotibi Entoni Blinken.
Izoh (0)