Chad o‘tish davri harbiy kengashi mamlakat parlamenti tashkil etilganini e’lon qildi. Unga O‘tish davri milliy kengashi deb nom berilgan.
Harbiy kengash rahbari Mahamat Idris Debining so‘zlariga ko‘ra, parlament tarkibi 93 kishidan tashkil topgan. Yangi parlament Chad muvaqqat hukumatining o‘tish davridagi faoliyatini nazorat qilishi kerak bo‘ladi.
Chadni 1996-yildan buyon boshqarib kelgan prezident Idris Debi 2021-yilning aprelida mamlakat shimolidagi isyonchilarga qarshi jang paytida olgan jarohatlaridan vafot etgandi.
Prezident vafotidan keyin hokimiyatga kelgan harbiylar chegaralarni yopib qo‘ydi. Shuningdek, armiya mamlakatda komendantlik soati e’lon qildi. Debi vafotidan keyin Chad hukumati va parlamenti tarqatib yuborildi. Keyingi 18 oy davomida mamlakatni harbiy kengash boshqarishi ma’lum qilindi. Unga marhum prezidentning o‘g‘illaridan biri, 37 yoshli general, prezident gvardiyasi qo‘mondoni Mahamat Idris Debi Itno boshchilik qildi.
Idris Debi Itno Afrikada hukumatni eng uzoq vaqt boshqargan rahbarlardan biri. U 1990-yilgi qo‘zg‘olon natijasida hokimiyatga kelgan. Uning hukmronligi davrida muxolifat prezidentni repressiyada ayblagan. Reuters xabariga ko‘ra, 2018-yilda Debi konstitutsiyaviy islohotni amalga oshirgan, bu unga 2033-yilgacha hokimiyatda qolishiga imkon bergandi. G‘arb davlatlarida, shu jumladan, Fransiyada Debi islomiy ekstremistik guruhlarga qarshi kurashda ittifoqdosh sifatida ko‘rilgan.
Izoh (0)