AQSh va Meksika chegarasida navbatdagi migratsion inqiroz sodir bo‘lmoqda. Asosan, Gaiti davlatidan kelgan, taxminan, 14 mingga yaqin muhojir Texas shtatining 35 mingga yaqin aholi yashaydigan Del Rio shahrida lager qurdi. Muhojirlar u yerga Meksikaning Syudad-Akunya shahridan Rio-Grande daryosining sayoz joylardan kechib o‘tish orqali kelmoqda. Muhojirlarning bunday oqimiga chegaraning Meksika tomonida nazorat zaiflashgani va gaitiliklarga AQShdan boshpana olish osonlashgani haqidagi mish-mishlar sabab bo‘lgan bo‘lishi mumkin.
Del-Rioga kelganlarga Rio-Grande ko‘prigi yaqinidagi maydon ajratilgan. Ular amalda ochiq havoda yashab, boshpana uchun murojaat qilish imkoniyatini kutmoqda. Vaqti-vaqti bilan ular oziq-ovqat va suv sotib olish, telefonlarini zaryadlash uchun Syudad-Akunyaga qaytadi.
Amerika va Meksika hukumati Gaiti fuqarolarini deportatsiya qilishni boshladi, Rio-Grande qirg‘og‘ida esa AQSh chegarani qo‘riqlash xizmatining zobitlari aylanib yuribdi. Bir necha kun oldin internetda muhojirlarning Amerika hududiga o‘tishiga to‘sqinlik qilinayotgani aks etgan fotosuratlar paydo bo‘ldi. Ma’lum bo‘lishicha, ofitserlar muhojirlarni qamchilagan, ammo boshqa manbalarga ko‘ra, ularning qo‘lida faqat jilovlar bo‘lgan. Oq uy bu kadrlarni dahshatli deb atadi, AQSh Ichki xavfsizlik vazirligi esa tergov boshladi.
Mavzuga doir:
Izoh (0)