Xorazmda o‘n olti nafar fuqaroning imtihondan o‘tolmagan farzandlarini superkontrakt asosida o‘qishga kiritib qo‘yishini aytib, ulardan 700 million so‘mga yaqin mablag‘ni olib, o‘z ehtiyoji uchun sarflab yuborgan shaxslarga sud hukmi o‘qildi. Bu haqda “Daryo” muxbiri Umidjon Mamarasulov xabar bermoqda.
Xorazm viloyat sudining jamoatchilik va OAV bilan aloqalar bo‘yicha bosh konsultanti Bunyod Husinovning aniqlik kiritishicha, Yangiariq tumanida yashovchi 1996-yilda tug‘ilgan fuqaro Xursanali Sardorov (barcha ism-shariflar o‘zgartirilgan) jinoiy sherigi Olim Ergashev bilan birga oliy ta’lim muassasalariga kirish imtihonlarini topshirib, ta’lim dargohiga kirolmagan bir necha fuqarolar va ularning yaqinlari soddaligidan foydalanib, oliy ta’lim muassasalarida oshirilgan shartnoma to‘lovlarini imtiyozli shaklda to‘lash imkoniyatlari borligi, kamroq to‘lovlarni to‘lash orqali o‘qish mumkinligi, pul mablag‘larini fuqarolar nomidan o‘zi to‘lab berishi to‘g‘risidagi yolg‘on va’dalar bergan. Ularning ishonchiga kirib, pullarini qo‘lga kiritgan.Jumladan, 2019-yilning sentabr oyida fuqaro Murod O‘rozov hamda Olim Ergashev Urganch davlat universiteti oldida uchrashib, O‘rmon Matisayevning imtihondan o‘tolmagan qizi Luiza Javohirovani oshirilgan superkontrakt orqali o‘zi topshirgan yo‘nalishi bo‘yicha o‘qishga kirishiga yordam berishini aytib, 2 ming dollar va 3 million 175 ming so‘m mablag‘ni qo‘lga kiritgan.
Shuningdek, Hayotbek Dushaboyevning o‘qishga kirolmagan o‘g‘li Sherali Jo‘rayevni superkontrakt orqali kiritib qo‘yishga va’da berib, 2019-yilning sentabr oyida 2 ming dollar, 2020-yilning fevral oyida 300 dollar hamda 150 ming so‘m pulni firibgarlik yo‘li bilan olgan.
Bundan tashqari 2019-yilning sentabr oyidan 2020-yilning fevral oyiga qadar fuqarolar D.R., G.A., A.A., Sh.I., X.B., J.R., Sh.M., A.I., N.R., G.K., U.Yu., F.Q., U.Ya. va L.O.dan ularning oliy ta’lim muassasasiga kirish imtihonlaridan yiqilgan farzandlarini qonunchilikda mavjud imtiyozlar orqali superkontrakt bilan o‘zi topshirgan yo‘nalish bo‘yicha o‘qishga kirishiga yordam berishni va’da berib, sherigi Olim Ergashev orqali turli miqdordagi pul mablag‘larini qo‘lga kiritgan.
“2019-yilning avgust oyida Olim aka menga superkontrakt orqali o‘qish masalasi bo‘yicha yordam kerakligini aytib, telefon qildi. Uni avvaldan taniganim uchun kelishuvga asosan u bilan Urganch davlat universiteti yaqinida uchrashib, gaplashdik. Shu yerda u oliy ta’lim muassasalariga o‘qishga topshirib yiqilgan tanishlari, hamqishloqlari borligi, agar rozi bo‘lsa, birga ishlashimiz mumkinligini aytib, hamkorlikka taklif qildi. Uning taklifga rozi bo‘lib, kimdan qanday tartibda pul undirish bo‘yicha reja tuzdik. Jabrlanuvchilarning barchasi bilan Olim Ergashev orqali tanishganman va birontasi bilan o‘zim uchrashmaganman. Uning olinadigan mablag‘larni belgilanganidan ko‘p miqdorda aytib yurganini bilmaganman. Chunki ayrim hollarda pullarni olgan paytimda u 1000—1500 dollar atrofida mablag‘ni xizmati uchun olib ketardi”, — deydi Xursanali Sardorov.
Xorazm viloyat sudining jinoyat ishlari bo‘yicha sudlov hay’ati hukmi bilan Xursanali Sardorov va Olim Ergashev Jinoyat kodeksining 168-moddasi 3-qismi “a”, “b” bandlari (ko‘p miqdorda, takroran yoki xavfli retsidivist tomonidan sodir etilgan firibgarlik) bilan aybli deb topilgan. Ularga Jinoyat kodeksining 57-moddasi qo‘llanib, Xursanali Sardorovga nisbatan 6 yil, Olim Ergashevga esa 5 yil ozodlikdan mahrum qilish jazosi tayinlangan. Shuningdek, sudlanuvchilardan solidar tartibda 16 nafar jabrlanuvchi foydasiga jami 683 million 123 ming 360 so‘m pul mablag‘i undirilishi belgilangan.
Izoh (0)