Milliy gvardiyaning Buxoro viloyati boshqarmasi ofitseri, katta leytenant Murodjon Rahmatullayevning “Daryo”ga xabar berishicha, 2021-yilning 22-sentabr kuni Buxoro shahri hududida joylashgan ko‘lda o‘zi va ikki yashar o‘g‘lining joniga suiqasd qilmoqchi bo‘lgan ayolning xatti-harakatlari Milliy gvardiya xodimlari tomonidan to‘xtatib qolingan.
Ta’kidlanishicha, shaharning Imom al-Buxoriy nomidagi mahallasida yashovchi 35 yoshli G.E. ismli ayol o‘zi va ikki yashar o‘g‘li S.T.ning joniga qasddan suiqasd qilib, “Somoniylar” istirohat bog‘ida joylashgan chuqurligi salkam besh metrni tashkil qiluvchi ko‘l suviga tashlashga uringan. Shu hududda jamoat tartibini saqlash va fuqarolar xavfsizligini ta’minlashga jalb qilingan Milliy gvardiya harbiy xizmatchilari — serjant Jalil Ashurov hamda kichik serjant Rustam Yo‘ldoshev esa ayolning xatti-harakatlarini o‘z vaqtida payqab, uni to‘xtatib qolgan.
“Ayolning shubhali harakatlarini payqab, chamasi, o‘n daqiqalar uni kuzatib turdik. Asabiy holatda yig‘lab turgan ayolning xatti-harakatidan o‘zi va o‘g‘lining joniga qasd qilishga chog‘lanayotgani ayon edi. Tezkor harakat bilan men o‘g‘lini, sherigim esa ayolning o‘zini qo‘lidan tutib qoldi. Shundan so‘ng unga xatti-harakatlari noto‘g‘riligini tushuntirib, hududiy ichki ishlar bo‘limiga olib bordik”, — dedi Jalil Ashurov.
Aniqlanishicha, ayol va uning 60 yoshli qaynonasi M.S. o‘rtasida oilaviy kelishmovchilik kelib chiqqan va janjal yuzaga kelgan. Shundan so‘ng G.E. bolasini yetaklab, hovlidan chiqib ketgan.
“Kunora janjallar o‘zimni ham charchatgan. Oxiri kelinimga ‘ota-onangning uyiga o‘n-o‘n besh kun ket, men asablarimni tinchlantiray, qarigan chog‘imda qachongacha bunday kelishmovchilikda siqilib yashayman’, dedim. U esa alam ustida ko‘lga borib, o‘zi va bolasini suvga tashlashga uringan. O‘g‘lim pul ishlash maqsadida xorijda yuribdi. Kelin esa har kuni hali u, hali bu qo‘shnining uyiga chiqib ketadi. So‘rasam, eri bilan internetda gaplashib qaytayotganini aytadi. Oxiri sabrim chidamay, tartibga chaqirdim. Ammo u sansirab, juda xunuk so‘zlar bilan meni haqoratladi. Axir, men ham onaman”, — deydi qaynona yig‘lagancha.
Qaynonaning aytishicha, kelini 35 yoshda, uning o‘g‘liga ikkinchi xotin bo‘lib tushgan. Va o‘g‘lining xotini hamda ikki nafar bolasi borligidan xabardor bo‘lgan.
“Nevaralarim hovlimga kelganda, ularga qarshilik ko‘rsatadi. Ular ham bolamning bolasi. 2015-yilda G.S. hovlimizga kelin bo‘lib tushganda 35 yoshda edi. O‘g‘limga xotin bo‘lib kelishiga qarshi bo‘lib chiqqanimizda, o‘shanda ham joniga qasd qilishga uringan edi”, — deydi qaynona.
Ichki ishlar boshqarmasi tomonidan “Daryo”ga ma’lumot berilishicha, G.S.ga voqeadan so‘ng himoya orderi berilgan. Tushuntirish va profilaktik ishlar olib borilgan. Uning holati psixologlar tomonidan o‘rganilishi hamda o‘zi doimiy nazoratda bo‘lishi lozimligi uqtirilgan.
“Ayolning qaynonasi mahallamizdagi faol ayollardan. Biror marotaba oilaviy janjallaridan xabar topmaganmiz. Kelini ham uydagi gapni ko‘chaga olib chiqmagan. Aslida, o‘zaro oilaviy ichki janjal shu darajaga yetgan ekan, demak, biz ham e’tiborsiz qolganmiz. Qaynona va kelin yuzlashtirildi. Kelin qaynonadan o‘zining xatti-harakatlari uchun qo‘ni-qo‘shni, mahalla-ko‘y oldida kechirim so‘radi. Qaynona-kelin yarashtirildi. Kelinni ish bilan ta’minlash choralarini ko‘ramiz”, — deydi mahalla fuqarolar yig‘ini raisi Bahodir Xo‘jayev.
Buxoro shahar hokimining xotin-qizlar masalalari bo‘yicha maslahatchisi Ma’rifat Umarovaning “Daryo”ga ma’lum qilishicha, ayol qaynonasi bilan yuzaga kelgan tortishuv sabab alam ustida farzandini emas, faqat o‘zini suvga tashlamoqchi bo‘lganini bildirgan.
“Shunga qaramasdan, qaynona-kelin o‘rtasidagi ichki kelishmovchilik boshqa ko‘ngilsiz holatlarni ham keltirib chiqarmasligi uchun ushbu oila bilan muntazam shug‘ullanishda davom etamiz”, — dedi Ma’rifat Umarova.
Izoh (0)