Хоразмда ўн олти нафар фуқаронинг имтиҳондан ўтолмаган фарзандларини суперконтракт асосида ўқишга киритиб қўйишини айтиб, улардан 700 миллион сўмга яқин маблағни олиб, ўз эҳтиёжи учун сарфлаб юборган шахсларга суд ҳукми ўқилди. Бу ҳақда «Дарё» мухбири Умиджон Мамарасулов хабар бермоқда.
Хоразм вилоят судининг жамоатчилик ва ОАВ билан алоқалар бўйича бош консултанти Бунёд Ҳусиновнинг аниқлик киритишича, Янгиариқ туманида яшовчи 1996 йилда туғилган фуқаро Хурсанали Сардоров (барча исм-шарифлар ўзгартирилган) жиноий шериги Олим Эргашев билан бирга олий таълим муассасаларига кириш имтиҳонларини топшириб, таълим даргоҳига киролмаган бир неча фуқаролар ва уларнинг яқинлари соддалигидан фойдаланиб, олий таълим муассасаларида оширилган шартнома тўловларини имтиёзли шаклда тўлаш имкониятлари борлиги, камроқ тўловларни тўлаш орқали ўқиш мумкинлиги, пул маблағларини фуқаролар номидан ўзи тўлаб бериши тўғрисидаги ёлғон ваъдалар берган. Уларнинг ишончига кириб, пулларини қўлга киритган.Жумладан, 2019 йилнинг сентябрь ойида фуқаро Мурод Ўрозов ҳамда Олим Эргашев Урганч давлат университети олдида учрашиб, Ўрмон Матисаевнинг имтиҳондан ўтолмаган қизи Луиза Жавоҳировани оширилган суперконтракт орқали ўзи топширган йўналиши бўйича ўқишга киришига ёрдам беришини айтиб, 2 минг доллар ва 3 миллион 175 минг сўм маблағни қўлга киритган.
Шунингдек, Ҳаётбек Душабоевнинг ўқишга киролмаган ўғли Шерали Жўраевни суперконтракт орқали киритиб қўйишга ваъда бериб, 2019 йилнинг сентябрь ойида 2 минг доллар, 2020 йилнинг февраль ойида 300 доллар ҳамда 150 минг сўм пулни фирибгарлик йўли билан олган.
Бундан ташқари 2019 йилнинг сентябрь ойидан 2020 йилнинг февраль ойига қадар фуқаролар Д.Р., Г.А., А.А., Ш.И., Х.Б., Ж.Р., Ш.М., А.И., Н.Р., Г.К., У.Ю., Ф.Қ., У.Я. ва Л.О.дан уларнинг олий таълим муассасасига кириш имтиҳонларидан йиқилган фарзандларини қонунчиликда мавжуд имтиёзлар орқали суперконтракт билан ўзи топширган йўналиш бўйича ўқишга киришига ёрдам беришни ваъда бериб, шериги Олим Эргашев орқали турли миқдордаги пул маблағларини қўлга киритган.
«2019 йилнинг август ойида Олим ака менга суперконтракт орқали ўқиш масаласи бўйича ёрдам кераклигини айтиб, телефон қилди. Уни аввалдан таниганим учун келишувга асосан у билан Урганч давлат университети яқинида учрашиб, гаплашдик. Шу ерда у олий таълим муассасаларига ўқишга топшириб йиқилган танишлари, ҳамқишлоқлари борлиги, агар рози бўлса, бирга ишлашимиз мумкинлигини айтиб, ҳамкорликка таклиф қилди. Унинг таклифга рози бўлиб, кимдан қандай тартибда пул ундириш бўйича режа туздик. Жабрланувчиларнинг барчаси билан Олим Эргашев орқали танишганман ва биронтаси билан ўзим учрашмаганман. Унинг олинадиган маблағларни белгиланганидан кўп миқдорда айтиб юрганини билмаганман. Чунки айрим ҳолларда пулларни олган пайтимда у 1000—1500 доллар атрофида маблағни хизмати учун олиб кетарди», — дейди Хурсанали Сардоров.
Хоразм вилоят судининг жиноят ишлари бўйича судлов ҳайъати ҳукми билан Хурсанали Сардоров ва Олим Эргашев Жиноят кодексининг 168-моддаси 3-қисми «а», «б» бандлари (кўп миқдорда, такроран ёки хавфли рецидивист томонидан содир этилган фирибгарлик) билан айбли деб топилган. Уларга Жиноят кодексининг 57-моддаси қўлланиб, Хурсанали Сардоровга нисбатан 6 йил, Олим Эргашевга эса 5 йил озодликдан маҳрум қилиш жазоси тайинланган. Шунингдек, судланувчилардан солидар тартибда 16 нафар жабрланувчи фойдасига жами 683 миллион 123 минг 360 сўм пул маблағи ундирилиши белгиланган.
Изоҳ (0)