Fuqarolik ishlari bo‘yicha Andijon tumanlararo sudi tomonidan chiqarilgan hal qiluv qaroridan norozi bo‘lib, sudyani sud zalida haqoratlagan shaxsga sud hukmi o‘qildi. Bu haqda “Daryo”ga viloyat sudi axborot xizmati ma’lum qildi.
Aniqlanishicha, sudlanuvchi Aziz Normatov Matluba Hasanova bilan 2013-yil iyun oyida turmush qurib, 2019-yil dekabr oyida oilaviy kelishmovchilik sababli ajrashgan. Turmushi davomida er-xotin o‘g‘illari — Omadbek va Olmosbeklarni dunyoga keltirgan. Ajrimdan so‘ng bolalar Azizning qaramog‘ida bo‘lgan. Oradan sakkiz oy o‘tib, xotini farzandlarini qaytarib olish maqsadida fuqarolik ishlari bo‘yicha Andijon tumanlararo sudiga ariza bilan murojaat qilgan. Uning arizasiga asosan sud muhokamasi o‘tkazilib, bolalar Matluba Hasanova qaramog‘iga olib berilgan. Farzandlarini sog‘ingan ota ayolning roziligi bilan ularni yashash xonadoniga olib kelgan. Oradan yetti kun o‘tgach esa kichik farzandini onasiga olib borib bergan. Katta farzandi Omadbek onasining oldiga borishni istamagani sababli o‘zi bilan qoldirgan. Shundan so‘ng Matluba Hasanova o‘g‘lini o‘zining qaramog‘iga olib berishni so‘rab, yana sudga murojaat qilgan.2021-yilning 19-aprel kuni o‘tkazilgan sud muhokamasida qatnashish maqsadida kelgan Aziz Normatov sudyadan sud jarayonini videotasvirga olib, kamera nazoratida o‘tkazilishini so‘ragan. Sudya bunga ruxsat bermasdan, farzandini onasi qaramog‘iga berish to‘g‘risida hal qiluv qarorini qabul qilgan. Sudya qarorni o‘qib bo‘lgandan so‘ng o‘zining noroziligini bildirib, tortishib ketgan va jahl ustida “kallasi ishlamaydigan sudya ekansan, sen ‘tupoy’ni kim sudya qilib tayinlagan” deb sudyani kurakda turmaydigan, shaxsning sha’ni, qadr-qimmatini kamsituvchi so‘zlar bilan haqorat qilgan.
Ushbu ishni ko‘rib chiqqan Jinoyat ishlari bo‘yicha Andijon shahar sudi sudyasi Ulug‘bek Sheraliyev javobgar Aziz Normatovni Jinoyat kodeksining 140-moddasi 3-qismining “a” bandida nazarda tutilgan jinoyatni sodir etganlikda aybli deb topgan. Unga nisbatan yashash joyini kechki soat 21:00 dan tonggi 6:00 ga qadar tark etishni bir yil muddatga taqiqlovchi, ozodlikni cheklash jazosi tayinlangan. Shuningdek, unga bir qator qo‘shimcha taqiqlar ham yuklangan.
Izoh (0)