Buxoro neftni qayta ishlash zavodi O‘zbekistonda birinchilardan bo‘lib yuqori oktanli avtomobil benzini ishlab chiqarishni yo‘lga qo‘ydi. Bu haqda “O‘zbekneftgaz” matbuot xizmati xabar berdi.
“Ai–98 markali avtomobil benzini, asosan, siqish darajasi 12 dan 14 gacha bo‘lgan dvigatelli avtomobillarda ishlatiladi. Ai–98 benzini yuqori detonatsiyaga qarshi xususiyat (oktan xarakteristika)lari tufayli dvigatel quvvatini oshiradi hamda tezlanish dinamikasini yaxshilaydi, tebranish, shovqin darajasini pasaytiradi, shuningdek, yonilg‘i sarfini sezilarli darajada kamaytiradi”, — deyiladi kompaniya xabarida.
Buxoro neftni qayta ishlash zavodi tomonidan 2021-yilning sentabr–dekabr oylarida 36,5 ming tonna Ai–91, 13,1 ming tonna Ai–92 1,4 ming tonna Ai–95, shundan 848 tonnasi QuWatt rusumidagi yuqori oktanli avtobenzin ishlab chiqarilishi kutilmoqda.
Shuningdek, 14,9 ming tonna Yevro–4, 11,4 ming tonna Yevro–5 rusumidagi dizel yonilg‘ilari ishlab chiqarilishi, 2021-yilning ikkinchi yarim yillik yakuniga qadar “Uzbekneftegaz GTL” sintetik kerosinini saqlash uchun 5 000 kub metr hajmda 2 dona saqlash sig‘imlarini qurish ishlarini yakuniga yetkazish rejalashtirilgan.
Bugungi kunda Buxoro neftni qayta ishlash zavodida 19 dan ortiq markaga ega bo‘lgan 9 ta turdagi mahsulot ishlab chiqariladi.
Avvalroq O‘zbekistonda benzin ishlab chiqarish hajmi oshgani haqida xabar berilgan edi. Davlat statistika qo‘mitasi dastlabki ma’lumotlariga ko‘ra, 1-sentabr holatiga ko‘ra jami 729,4 ming tonna avtomobil benzini ishlab chiqarilgan. Bu o‘tgan yilning mos davri bilan solishtirilganda 5,1 foizga ko‘p. Mamlakatda 2021-yil boshidan buyon ishlab chiqarilgan benzinning deyarli barchasi Buxoro viloyati hisobiga to‘g‘ri kelmoqda.
Izoh (0)