Фуқаролик ишлари бўйича Андижон туманлараро суди томонидан чиқарилган ҳал қилув қароридан норози бўлиб, судьяни суд залида ҳақоратлаган шахсга суд ҳукми ўқилди. Бу ҳақда «Дарё»га вилоят суди ахборот хизмати маълум қилди.
Аниқланишича, судланувчи Азиз Норматов Матлуба Ҳасанова билан 2013 йил июнь ойида турмуш қуриб, 2019 йил декабрь ойида оилавий келишмовчилик сабабли ажрашган. Турмуши давомида эр-хотин ўғиллари — Омадбек ва Олмосбекларни дунёга келтирган. Ажримдан сўнг болалар Азизнинг қарамоғида бўлган. Орадан саккиз ой ўтиб, хотини фарзандларини қайтариб олиш мақсадида фуқаролик ишлари бўйича Андижон туманлараро судига ариза билан мурожаат қилган. Унинг аризасига асосан суд муҳокамаси ўтказилиб, болалар Матлуба Ҳасанова қарамоғига олиб берилган. Фарзандларини соғинган ота аёлнинг розилиги билан уларни яшаш хонадонига олиб келган. Орадан етти кун ўтгач эса кичик фарзандини онасига олиб бориб берган. Катта фарзанди Омадбек онасининг олдига боришни истамагани сабабли ўзи билан қолдирган. Шундан сўнг Матлуба Ҳасанова ўғлини ўзининг қарамоғига олиб беришни сўраб, яна судга мурожаат қилган.2021 йилнинг 19 апрель куни ўтказилган суд муҳокамасида қатнашиш мақсадида келган Азиз Норматов судьядан суд жараёнини видеотасвирга олиб, камера назоратида ўтказилишини сўраган. Судья бунга рухсат бермасдан, фарзандини онаси қарамоғига бериш тўғрисида ҳал қилув қарорини қабул қилган. Судья қарорни ўқиб бўлгандан сўнг ўзининг норозилигини билдириб, тортишиб кетган ва жаҳл устида «калласи ишламайдиган судья экансан, сен ‘тупой’ни ким судья қилиб тайинлаган» деб судьяни куракда турмайдиган, шахснинг шаъни, қадр-қимматини камситувчи сўзлар билан ҳақорат қилган.
Ушбу ишни кўриб чиққан Жиноят ишлари бўйича Андижон шаҳар суди судьяси Улуғбек Шералиев жавобгар Азиз Норматовни Жиноят кодексининг 140-моддаси 3-қисмининг «а» бандида назарда тутилган жиноятни содир этганликда айбли деб топган. Унга нисбатан яшаш жойини кечки соат 21:00 дан тонгги 6:00 га қадар тарк этишни бир йил муддатга тақиқловчи, озодликни чеклаш жазоси тайинланган. Шунингдек, унга бир қатор қўшимча тақиқлар ҳам юкланган.
Изоҳ (0)