Faoliyatida biror marta mag‘lubiyatga uchramagan va onasiga bergan va’da tufayli MMA’ni tark etgan tirik afsona — Habib Nurmagomedov 33 yoshda
Habib Nurmagomedov — aralash janglar tarixidagi eng kuchli sportchilardan biri. Butun faoliyati davomida 29 marta jang qilib, biror marta mag‘lubiyatga uchramagan. Bolaligida Fyodor Yemelyanenkoning muxlisi bo‘lgan Habib 33 yoshni qarshi oldi. Quyida uning faoliyatiga oid ayrim suratlar va ma’lumotlar taqdim etiladi.
Habibning otasi Abdulmanap Nurmagomedovning ta’kidlashicha, farzandi ilk qadamlarini tatamida tashlagan. Habib 2 yoshga kirganda esa otasi uni shug‘ullantira boshlagan. 5 yoshida Habib yakkakurash usullarini o‘rgana boshlagan. Foto: Instagram / Habib Nurmagomedov
Bir kuni do‘stlari Habibga aralash janglar yozib olingan tasmani ko‘rsatadi. Nurmagomedovga aralash jang san’ati (MMA) yoqib qoladi va ushbu sport turida o‘zini sinab ko‘rishni xohlaydi. Foto: Instagram / Habib Nurmagomedov
Habib 2000-yillarda faoliyatining cho‘qqisiga erishgan rossiyalik Fyodor Yemelyanenkoning muxlisiga aylanadi. U bir necha bor intervyularida Yemelyanenkoni aralash jang san’ati tarixidagi eng yaxshi jangchi deb ta’kidlagan.Foto: Ringside
2012-yilda UFC bilan shartnoma imzolaydi. 20-yanvarda esa Nurmagomedov Kamal Shalorusga qarshi jang qiladi va uchinchi raundda g‘alaba qozonadi.Foto: Getty Images
Habib otasi Abdulmanap Nurmagomedov bilanFoto: Getty Images
2018-yil aprel oyida Habib Nurmagomedov yengil divizion vakant chempionlik kamari uchun Toni Fergyusonga qarshi jang qilishi e’lon qilindi. Lekin jangga 6 kun qolganda Fergyuson tizzasidan jarohat oldi va uning o‘rnini Maks Hollouey egalladi. Lekin unga ham sog‘lig‘idagi muammo tufayli shifokorlar ruxsat bermadi. Yakunda El Yakvinta Habibning raqibiga aylandi. Habib hech qanday imkoniyat qoldirmasdan Yakvintani mag‘lub etdi va chempionga aylandi. Foto: Getty Images
2018-yilning oktabr oyida esa UFC 229 da chempionlik titulini himoya qilish maqsadida Konor Makgregorga qarshi jang qildi. 4-raundda Habib raqibini bo‘g‘ish usulida mag‘lub etdi. Foto: Getty Images
Jangdan so‘ng Makgregorning sparring sherigi Dennis Dillon bilan nizo yuzaga keldi va Habib to‘siqdan sakrab o‘tib, Dillonga tashlandi. Foto: Getty Images
Nurmagomedov va Makgregor jamoalari o‘rtasida jang boshlanib ketdi. Irlandiyalik sportchi ham zarba qabul qilib oldi. Habibga chempionlik kamari oktagonda topshirilmadi. Foto: Getty Images
MMA bo‘yicha GFC 20 musobaqasining faxriy mehmoni Habib Nurmagomedov 2019-yil 20-noyabr sanasida Toshkentga keldi.Foto: “Daryo”
2020-yilda Habib Nurmagomedov o‘z Instagram sahifasiga O‘zbekiston gerbi tushirilgan libosda mashg‘ulot o‘tayotgani tasvirlangan suratni qo‘ygandi. Foto: Instagram
2020-yil 3-iyul kuni Habib Nurmagomedovning otasi Abdulmanap Nurmagomedov koronavirus asoratlari oqibatida vafot etdi. Foto: Getty Images
2020-yilda Habib Nurmagomedov va Toni Fergyuson o‘rtasida bo‘lib o‘tishi mo‘ljallangan jang 5-marta qoldirildi.Foto: Getty Images
2020-yil 24-oktabr kuni Abu-Dabida Habib amerikalik Jastin Getjiga qarshi jang qildi. Habib ikkinchi raundda bo‘g‘ish usuli bilan g‘alaba qozondi.Foto: Getty Images
Foto: Getty Images
Ushbu jangdan so‘ng Habib Nurmagomedov faoliyatini yakunlaganini e’lon qildi.Foto: Getty Images
Habib Nurmagomedov professional faoliyati davomida 29 ta jang o‘tkazib, barchasida g‘alaba qozongan. Sportchi onasiga “endi jang qilmayman”, deb va’da bergani uchun faoliyatini yakunlaganini e’lon qildi.Foto: Getty Images
2020-yil oxirida Habib Gorilla Fighting Championship (GFC) promoushenini sotib oldi va musobaqa nomini EFC’ga (Eagle Fighting Championship) o‘zgartirdi. Habib yaqin orada EFC musobaqalaridan birini O‘zbekistonda o‘tkazishga va’da berdi.Foto: Getty Images
Izoh (0)