Turkiya prezidenti Rajab Toyyib Erdo‘g‘on Birlashgan Millatlar Tashkiloti (BMT) Bosh Assambleyasi doirasida uchrashuv o‘tkazadigan davlatlar rahbarlariga o‘zining “Dunyo adolatliroq bo‘lishi mumkin” (“Yana adil dunyo mumkun”) nomli yangi kitobini taqdim etadi. Bu haqda Anadolu Agency xabar berdi.
Turkiya rahbari BMT Bosh assambleyasi va boshqa qator tadbirlarda ishtirok etish uchun 19-sentabr kuni Nyu-Yorkka jo‘nab ketadi. Erdo‘g‘on assambleya doirasida yig‘iladigan yetakchi davlatlar rahbarlariga “Dunyo adolatliroq bo‘lishi mumkin” kitobining inliz tiliga tarjima qilingan nusxasini taqdim etmoqchi. Turkiya rahbarining kitobi ingliz tilidan tashqari arab va fransuz tillariga tarjima qilingan.
Kitobda davlat rahbari Turkiyaning butun insoniyat uchun adolatni ta’minlash borasidagi say-harakatlarini batafsil bayon qiladi. Turkiya rahbari o‘z ishida global siyosatdagi ikkilanishlarga, xususan, adolatsizlik, migratsion inqiroz, xalqaro terrorizm va islomofobiya muammosiga ishora qilib, dunyodagi diskriminatsiya va ikki tomonlama standartlarni BMT misolida ochib berdi.
Kitob muallifi BMTning qonuniylik, salohiyat, samaradorlik, inklyuzivlik, vakillik va boshqaruv kabi muammolariga e’tibor qaratdi. Turkiya prezidenti BMT Xavfsizlik Kengashini tubdan isloh qilish zarurligini ta’kidlaydi. Qolaversa, Erdo‘g‘on zamonaviy jahon hamjamiyati uchun eng zaruri adolat ekanini aytadi.
Turkiyada Erdo‘g‘onning yangi kitobi 6-sentabrdan sotuvga chiqarilgandi. Qayd etilishicha, kitobning ingliz, arab, nemis, fransuz, rus va ispan tillariga tarjima qilinishidan tushadigan mablag‘larning barchasi Turkiya Favqulodda vaziyatlar boshqarmasiga o‘tkaziladi.
Izoh (0)