Туркия президенти Ражаб Тоййиб Эрдўғон Бирлашган Миллатлар Ташкилоти (БМТ) Бош Ассамблеяси доирасида учрашув ўтказадиган давлатлар раҳбарларига ўзининг «Дунё адолатлироқ бўлиши мумкин» («Yana adil dunyo mumkun») номли янги китобини тақдим этади. Бу ҳақда Anadolu Agency хабар берди.
Туркия раҳбари БМТ Бош ассамблеяси ва бошқа қатор тадбирларда иштирок этиш учун 19 сентябрь куни Нью-Йоркка жўнаб кетади. Эрдўғон ассамблея доирасида йиғиладиган етакчи давлатлар раҳбарларига «Дунё адолатлироқ бўлиши мумкин» китобининг инлиз тилига таржима қилинган нусхасини тақдим этмоқчи. Туркия раҳбарининг китоби инглиз тилидан ташқари араб ва француз тилларига таржима қилинган.
Китобда давлат раҳбари Туркиянинг бутун инсоният учун адолатни таъминлаш борасидаги сай-ҳаракатларини батафсил баён қилади. Туркия раҳбари ўз ишида глобал сиёсатдаги иккиланишларга, хусусан, адолатсизлик, миграцион инқироз, халқаро терроризм ва исломофобия муаммосига ишора қилиб, дунёдаги дискриминация ва икки томонлама стандартларни БМТ мисолида очиб берди.
Китоб муаллифи БМТнинг қонунийлик, салоҳият, самарадорлик, инклюзивлик, вакиллик ва бошқарув каби муаммоларига эътибор қаратди. Туркия президенти БМТ Хавфсизлик Кенгашини тубдан ислоҳ қилиш зарурлигини таъкидлайди. Қолаверса, Эрдўғон замонавий жаҳон ҳамжамияти учун энг зарури адолат эканини айтади.
Туркияда Эрдўғоннинг янги китоби 6 сентябрдан сотувга чиқарилганди. Қайд этилишича, китобнинг инглиз, араб, немис, француз, рус ва испан тилларига таржима қилинишидан тушадиган маблағларнинг барчаси Туркия Фавқулодда вазиятлар бошқармасига ўтказилади.
Изоҳ (0)