“Qo‘qon” tashqi iqtisodiy faoliyat bojxona postidan qariyb 11,9 milliard so‘mlik kosmetika va pardoz vositalari o‘rnida shisha idishlar va kir yuvish kukunlarini o‘tkazishga uringan yuk avtomashinasi aniqlandi. Bu haqda “Daryo”ga Bojxona qo‘mitasi axborot xizmati bosh inspektori Husan Tangriyev xabar berdi.
Ta’kidlanishcha, qo‘mita va uning Farg‘ona, Navoiy, Namangan hamda Samarqand viloyatlari bo‘yicha boshqarmalari tezkor tuzilmalari tomonidan respublika hududiga import tarzida olib kirilgan tovar-moddiy boyliklarni bojxona rasmiylashtiruviga qadar almashtirib qo‘yishga bo‘lgan urinishga chek qo‘yilgan.
Aniqlanishicha, Toshkent viloyatida ro‘yxatdan o‘tkazilgan tadbirkorlik subyektlaridan birining nomiga xorijdan keltirilgan yuk konteyneridagi kosmetika va pardoz vositalari belgilangan tartibda rasmiylashtirish uchun “Qo‘qon” tashqi iqtisodiy faoliyat bojxona postiga yo‘naltirilgan. Biroq mazkur konteynerdagi kosmetika va pardoz vositalari o‘rnida salkam 1,5 tonna shisha idish hamda 21 tonnadan ziyod kir yuvish kukuni ortilganligi aniqlangan.
Holat yuzasidan Davlat bojxona qo‘mitasi va uning Farg‘ona, Navoiy, Namangan va Samarqand viloyatlari bo‘yicha boshqarmalari tuzilmalari tomonidan keng qamrovli tezkor tadbirlar uyushtirilgan. Tezkor guruh tomonidan amalga oshirilgan tadbirlar natijasida yuk konteynerini olib kelgan haydovchi fuqaro Mansur Quvonchev (ism-sharifi o‘zgartirilgan) ekaniga oydinlik kiritilgan. Konteynerdagi tovarlar Toshkent viloyati Bektemir tumanidagi omborlardan biriga tushirib qoldirilgani aniqlangan.
“Holat yuzasidan kechiktirib bo‘lmas tezkor qidiruv tadbirlari o‘tkazilib, zudlik bilan Bektemir tumanidagi omborxona ko‘zdan kechirildi. Ammo, bu vaqtda omborga tushirilgan tovarlar boshqa transport vositasiga ortilib, bu yerdan ham olib chiqib ketilganligi ma’lum bo‘ldi”, — dedi Husan Tangriyev.
Ma’lum bo‘lishicha, tezkor qidiruv ishlari davom etgan va ombordan olib chiqib ketilgan yuklar Samarqand viloyatining Urgut tumanidagi tadbirkorlardan birining omboriga tushirilgani aniqlangan. Mazkur ombor belgilangan tartibda ko‘zdan kechirilgan hamda, unda 461 turdagi salkam 721 ming dona kosmetika va pardoz vositalari, shuningdek, shisha idishlar va kir yuvish kukunlari saqlanayotganligi aniqlangan.
Bildirilishicha, ushbu tovarlarning umumiy qiymati 11 milliard 881 million 700 ming so‘mni tashkil qiladi. Mazkur holat yuzasidan bojxona organlari tomonidan jinoyat ishi qo‘zg‘atilgan.
Izoh (0)