«Қўқон» ташқи иқтисодий фаолият божхона постидан қарийб 11,9 миллиард сўмлик косметика ва пардоз воситалари ўрнида шиша идишлар ва кир ювиш кукунларини ўтказишга уринган юк автомашинаси аниқланди. Бу ҳақда «Дарё»га Божхона қўмитаси ахборот хизмати бош инспектори Ҳусан Тангриев хабар берди.
Таъкидланишча, қўмита ва унинг Фарғона, Навоий, Наманган ҳамда Самарқанд вилоятлари бўйича бошқармалари тезкор тузилмалари томонидан республика ҳудудига импорт тарзида олиб кирилган товар-моддий бойликларни божхона расмийлаштирувига қадар алмаштириб қўйишга бўлган уринишга чек қўйилган.
Аниқланишича, Тошкент вилоятида рўйхатдан ўтказилган тадбиркорлик субъектларидан бирининг номига хориждан келтирилган юк контейнеридаги косметика ва пардоз воситалари белгиланган тартибда расмийлаштириш учун «Қўқон» ташқи иқтисодий фаолият божхона постига йўналтирилган. Бироқ мазкур контейнердаги косметика ва пардоз воситалари ўрнида салкам 1,5 тонна шиша идиш ҳамда 21 тоннадан зиёд кир ювиш кукуни ортилганлиги аниқланган.
Ҳолат юзасидан Давлат божхона қўмитаси ва унинг Фарғона, Навоий, Наманган ва Самарқанд вилоятлари бўйича бошқармалари тузилмалари томонидан кенг қамровли тезкор тадбирлар уюштирилган. Тезкор гуруҳ томонидан амалга оширилган тадбирлар натижасида юк контейнерини олиб келган ҳайдовчи фуқаро Мансур Қувончев (исм-шарифи ўзгартирилган) эканига ойдинлик киритилган. Контейнердаги товарлар Тошкент вилояти Бектемир туманидаги омборлардан бирига тушириб қолдирилгани аниқланган.
«Ҳолат юзасидан кечиктириб бўлмас тезкор қидирув тадбирлари ўтказилиб, зудлик билан Бектемир туманидаги омборхона кўздан кечирилди. Аммо, бу вақтда омборга туширилган товарлар бошқа транспорт воситасига ортилиб, бу ердан ҳам олиб чиқиб кетилганлиги маълум бўлди», — деди Ҳусан Тангриев.
Маълум бўлишича, тезкор қидирув ишлари давом этган ва омбордан олиб чиқиб кетилган юклар Самарқанд вилоятининг Ургут туманидаги тадбиркорлардан бирининг омборига туширилгани аниқланган. Мазкур омбор белгиланган тартибда кўздан кечирилган ҳамда, унда 461 турдаги салкам 721 минг дона косметика ва пардоз воситалари, шунингдек, шиша идишлар ва кир ювиш кукунлари сақланаётганлиги аниқланган.
Билдирилишича, ушбу товарларнинг умумий қиймати 11 миллиард 881 миллион 700 минг сўмни ташкил қилади. Мазкур ҳолат юзасидан божхона органлари томонидан жиноят иши қўзғатилган.
Изоҳ (0)