Shimoliy Koreya ballistik raketalarni qanday maqsadda uchirganini ma’lum qildi

Shimoliy Koreya 15-sentabr kuni yangi temiryo‘l-mobil raketa polkining jangovar tayyorgarligini sinab ko‘rish uchun raketa uchirgan. Bu haqda Koreya markaziy telegraf agentligiga tayanib, “RBK” xabar berdi.

“O‘t ochishni sinovdan o‘tkazishning maqsadi — birinchi marta jangga tatbiq qilingan temiryo‘l-mobil raketa tizimining amaliyligini tasdiqlash, kutilmagan tarzda jangovar tayyorgarlik va yangi polkning o‘t ochish vazifalarini bajarish qobiliyatini baholash va jang tartibini ishlab chiqish”, — deyiladi xabarda.

Markaziy telegraf agentligi ta’kidlashicha, polk yangi mudofaa strategiyasi doirasida yaratilgan. Yangi bo‘linma “zarur harbiy-operatsion vaziyatda” dushmanga bir vaqtning o‘zida turli tomondan zarba berish qobiliyatini oshirish uchun kerak, deydi agentlik. Xabarga ko‘ra, polk mashg‘ulotlar paytida markaziy tog‘li hududga manyovr qilib, 800 kilometr masofadagi nishonga zarba berishi kerak bo‘lgan. Nishon Yapon dengizida joylashgan edi.

Sinovlarda Shimoliy Koreya rahbari Kim Chen In qatnashmagan. Ularning borishini Koreya Mehnat partiyasi markaziy qo‘mitasi kotibi Pak Chon Chxon kuzatib turgan. Kotibning aytishicha, kelajakda polkni kengaytirib, temiryo‘l-ko‘chma raketa brigadasiga aylantirish rejalashtirilgan.

15-sentabr kuni Janubiy Koreyaning Yonhap agentligi Shimoliy Koreya Yapon dengizi tomon ikkita ballistik raketa uchirgani haqida xabar bergandi.

Keyinroq KXDR agar Seul Pxenyan haqida “noo‘rin” bayonotlar tarqatsa, Janubiy Koreya bilan munosabatlar buzilishi mumkinligi haqida ogohlantirdi.

KXDR yetakchisining singlisi va Koreya mehnat partiyasi markaziy qo‘mitasi rahbarining o‘rinbosari Kim Yo Chjonning aytishicha, Janubiy Koreya prezidenti Mun Chje Inning “ Janubiy Koreya yangi raketalarining KXDRga yetib bora olishi haqidagi izohlari be’mani va achinarli”. Uning so‘zlariga ko‘ra, Mun Chje In Shimoliy Koreya obro‘siga putur yetkazishda davom etsa, bu o‘zaro munosabatlarning uzilishiga olib kelishi mumkin.

Avvalroq Janubiy Koreya prezidenti suv osti bazasidagi ballistik raketalarni sinovdan o‘tkazish haqida gapirgandi, uning so‘zlariga ko‘ra, raketalar tahdidlarni oldini olish va milliy mudofaani ta’minlash uchun juda muhim.

Shuningdek, KXDR ikkita ballistik raketani uchirgandan so‘ng Mun Chje In ushbu hodisa bilan bog‘liq muammolarni muhokama qilish uchun Milliy xavfsizlik kengashining yig‘ilishi o‘tkazishni buyurdi.