Франция АҚШ билан бирга Чесапик денгиз жангининг 240 йиллигига бағишланган тантаналарни нишонлашдан бош тортди. Франция ушбу қарорни Австралия Франциянинг сувости кемасини ишлаб чиқарувчи компанияси билан шартномани бекор қилиб, Буюк Британия ва АҚШ билан мудофаа альянсини тузишга келишиб олганидан сўнг қабул қилган.
Чесапик жанги (АҚШ мустақиллиги учун денгизда кечган ҳал қилувчи жанг)нинг юбилейига бағишланган тадбирлар 17 сентябрь, жума кунига режалаштирилган эди. Тантаналарга Франция денгиз флотининг Вашингтонда бўлиб турган юқори мартабали вакили ташриф буюриши керак эди, лекин у муддатидан олдин Парижга қайтишга қарор қилди.
Бошқа тадбирлар, жумладан, Мериленд штатининг Балтимор ва Аннаполис шаҳарларидаги француз фрегатининг бортида гулчамбар қўйиш маросими бекор қилинмади, деб хабар беради CNBC Франция расмийларига таяниб.
Аввалроқ Австралия, АҚШ ва Буюк Британия янги мудофаа альянси — AUKUS’ни тузган эди. AUKUS’нинг илк йирик ташаббуси Австралияни атомли сувости флоти билан қуроллантириш бўлди. Янги ҳамкорлик фонида Австралия Франциянинг Naval Group ҳарбий кемасозлик компанияси билан тузган рекорд даражада қиммат шартномани тўхтатди.
Австралия уни 2016 йилда имзолаган, шартнома 12 та оддий сувости кемасини қуришни назарда тутган. Лойиҳага 90 миллиард Австралия доллари (66 миллиард АҚШ доллари) талаб қилиниб, бу шартнома Австралия денгиз флоти тарихидаги энг қиммати бўларди. Шартнома нафақат сувости кемаларини етказиб беришни, балки уларни базалаш учун инфратузилма яратишни, шунингдек, экипажларни техник қўллаб-қувватлаш ва 50 йил давомида ўқитишни назарда тутганди. Франция ташқи ишлар вазири Жан-Ив Ле Дриан шартноманинг бекор қилинишини «орқадан пичоқ уриш» деб атади.
Изоҳ (0)