Toshkentning “Chilonzor” metrosi oldida IIО xodimlari va fuqarolar o‘rtasidagi ziddiyatli vaziyat aks etgan videotasvirlar ijtimoiy tarmoqlarda tarqaldi. Poytaxt IIBB matbuot xizmati ushbu videotasvirlarda aks etgan holatga oydinlik kiritdi.
Ma’lum qilinishicha, 12-sentabr kuni soat 12:20 larda Chilonzor tumanidagi Bunyodkor va KHAY ko‘chalari kesishmasida Toshkent shahar IIBB YHXB YPX inspektorlari Cobalt avtomobil haydovchisi 35 yoshli B.U.ni yo‘l harakati qoidalarini buzganligi uchun to‘xtatgan.
Ma’muriy huquqbuzarlik sodir etgan shaxsga bayonnoma rasmiylashtirish jarayonida yo‘l chetida to‘xtab turgan avtomobil haydovchisi 29 yoshli T.R. aralashgan va xodimlarning qonuniy faoliyatiga to‘sqinlik qilib, janjal ko‘targan hamda ichki ishlar organi xodimiga faol qarshilik ko‘rsatib, tan jarohati yetkazgan.
Huquqbuzarning noqonuniy harakatlariga chek qo‘yish maqsadida yaqin orada xizmat olib borayotgan PPX xodimlari yetib kelgan. IIO xodimlari T.R.ni yaqin oradagi IIBga olib ketish uchun transport vositasiga o‘tqizish jarayonida aks etgan video ijtimoiy tarmoqlarda tarqalgan.
“Janjal ishtirokchilari Chilonzor tumani IIO FMBga olib borilgan. Mazkur holat yuzasidan tergovga qadar tekshiruv olib borilmoqda. Tekshiruv yakuni bo‘yicha ichki ishlar organlari xodimlarining qonuniy faoliyatiga qarshilik ko‘rsatgan barcha fuqarolarning shaxsi aniqlanib, ularning qilmishiga huquqiy baho beriladi va ularga nisbatan qonuniy chora ko‘riladi”, — deyiladi poytaxt IIBB xabarda.
Mavzuga doir:
- Toshkentda IIBB xodimlari ayollarni kuch ishlatib, xizmat mashinasiga o‘tqizayotgani aks etgan video bo‘yicha rasmiy izoh berildi
- Qo‘yliq bozorida IIB xodimlari sotuvchi ayolga kuch ishlatgani aks etgan video tarqaldi. IIV holat bo‘yicha izoh berdi
- Toshkentda mast IIB xodimi 80 yoshli otaxonni niqob taqmagani uchun kuch ishlatib olib ketmoqchi bo‘lgani aytilgan video yuzasidan rasmiy ma’lumot berildi
Izoh (0)