Тошкентда 4 нафар ЙПХ ходими ҳайдовчини ургани айтилган хабар юзасидан хизмат текшируви якунланди

Аввалроқ Ижтимоий тармоқда «4 нафар ГАИ ходимлари мени урди» сарлавҳаси остида тарқалган видео юзасидан хизмат текшируви тайинланганди.

Эслатиб ўтамиз, 2021 йил 14 июль куни соат 16:00 ларда Тошкент шаҳар ИИББ ЙҲХБ ЙПХ инспекторлари И.Тошматов ва С.Бегматовлар «А.Турбанов» ЙПХ масканида хизмат олиб бораётган вақтда Isuzu юк автомашинаси ҳайдовчиси ходимларнинг тўхташ ишорасига бўйсунмай ҳаракатда давом этган.

Кўрилган тезкор чора-тадбирлар натижасида транспорт воситаси тўхтатилган ва текшириш давомида ҳайдовчининг ҳужжатлари тўлиқ эмаслиги аниқланган.

Ҳайдовчига Маъмурий жавобгарлик тўғрисидаги кодекснинг 135 (йўл ҳаракати қоидаларида назарда тутилган ҳужжатлари бўлмаган шахсларнинг транспорт воситаларини бошқариши), 194-моддаларига (ички ишлар органлари ходимининг қонуний талабларини бажармаслик) асосан маъмурий баённома расмийлаштирилиб, автомашина жарима майдонига жойлаштирилган.

ЙҲХББ ахборот хизматининг маълум қилишича, ҳолат юзасидан хизмати текшируви якунланган.

Текширув якунига кўра, Isuzu русумли автомобиль ҳайдовчиси Н.О.га нисбатан Маъмурий жавобгарлик тўғрисидаги кодекснинг 135 ҳамда 194-моддалари тартибида расмийлаштирилган баённома асосли деб топилиб, ЙПХ ходимлари томонидан хизмат ўташ вақтида белгиланган қарор ва буйруқ талаблари бузилмагани аниқланган.