Prezident Shavkat Mirziyoyev 10-sentabr, juma kuni Tokiodagi yozgi Paralimpiya o‘yinlari ishtirokchilari bilan o‘tkazilgan uchrashuvda 2024-yilda Parijda bo‘ladigan Paralimpiya o‘yinlariga aniq tizim asosida tayyorgarlik ko‘rish zarurligini aytdi. Bu haqda “Daryo” muxbiri xabar bermoqda.
“Erishgan yutuqlarimizni mustahkamlab, vatanimizning sport sohasidagi ulkan salohiyatini tobora kengroq namoyon etish uchun 2024-yilda Parijda bo‘ladigan Paralimpiya o‘yinlariga bugundan boshlab aniq tizim asosida tayyorgarlik ko‘rishimiz zarur.
Jumladan, kelgusi musobaqalarga stol tennisi, qilichbozlik, kamondan otish, velosport, ot sporti, badminton singari turlar bo‘yicha ham yo‘llanmalar uchun kurashish kerak.
Shu munosabat bo‘lg‘usi Paralimpiya o‘yinlariga puxta hozirlik ko‘rish uchun, xorijiy mamlakatlardan eng tajribali mutaxassis va murabbiylarni jalb qilamiz.
Shu bilan birga, joylarda jismoniy imkoniyati cheklangan fuqarolarimiz o‘rtasida paralimpiya harakatini rivojlantirish dasturlarini ishlab chiqib, amalga oshirishimiz zarur”, — dedi Shavkat Mirziyoyev.
Davlat rahbari para-sport turlari bo‘yicha iqtidorli atletlarni saralash va ularning zaxirasini shakllantirish tizimini takomillashtirish lozimligini qayd etdi.
“Xususan, sport ta’limi maskanlarida tegishli o‘qitish dasturlari va metodikasini joriy qilish bilan birga, ularda paralimpiya bo‘limlarini tashkil etib, qo‘shimcha kvotalar ajratamiz.
Aziz Abduhakimov M.Toshxo‘jayev bilan birga, ikki oy muddatda sport maktablarida jismoniy imkoniyati cheklangan bolalar uchun maxsus guruhlar faoliyatini yo‘lga qo‘ysin.
Shuningdek, jismoniy imkoniyati cheklangan yoshlar orasida sportga qiziqishi kuchli bo‘lgan yigit-qizlar ko‘plab topiladi. Tibbiy-ijtimoiy ekspert komissiyasi bilan hamkorlikda, joylarda seleksiya ishlarini tizimli yo‘lga qo‘yish lozim.
Abduhakimov, A.Inakov, M.Toshxo‘jayev ikki oy muddatda joylarda sportga qobiliyati bor ana shunday yoshlarimizni para-sport turlariga keng jalb etish va ularni tarbiyalashni nazarda tutadigan hukumat qarorini tayyorlasin”, — deya mutasaddilarga topshiriq berdi Prezident.
Izoh (0)