“O‘zbekneftgaz” AJ boshqaruvi raisi Mehriddin Abdullayev boshchiligidagi ishchi guruh Muborak neft va gaz qazib chiqarish boshqarmasida ishchi xodimlar uchun yaratilgan sharoit hamda konlarda olib borilayotgan chora-tadbirlar holatini o‘rganmoqda.
Dastlab, 2017—2021-yillarda uglevodorod xomashyosini qazib chiqarishni ko‘paytirish dasturi doirasida texnologik obyektlar va gaz quvurlari loyihalarining ijrosi holati o‘rganildi.
Bunda “Dengizko‘l” konida qurilish ishlari olib borilayotgan siquv kompressor stansiyasi 2-navbatining qurilish-montaj ishlari ishchi guruh bilan joyida o‘rganilib, qilinishi lozim bo‘lgan vazifalar belgilab berildi.
Kuz-qish mavsumida iqtisodiyot va aholini yoqilg‘i energetika resurslariga bo‘lgan talabi oshib borishini hisobga olib, bosh pudratchi Enter Engineering kompaniyasi bilan birgalikda, ushbu stansiyasini dekabr oyida ishga tushirish uchun barcha resurslarni jalb qilish, kompressor texnologik qurilmalarini yetkazib berib o‘rnatish, ishga tushirish ishlarini yanada jadallashtirish masalalar muhokama qilindi.
Shuningdek, stansiyasi ishga tushirilishi bilan “Dengizko‘l” konidan gaz qazib olish jarayonlarini optimallashtirish, gaz quvurlarining o‘tkazuvchanligini oshirish maqsadida amalga oshirilayotgan qo‘shimcha gaz quvurlarini qurilish loyihalarini o‘z vaqtida topshirishni ta’minlash bo‘yicha mas’ullarga ko‘rsatmalar berildi.
Shundan so‘ng, “Dengizko‘l” siquv kompressor stansiyasidagi mavjud gaz haydash agregatlarining ish holati o‘rganildi. Bu yerda siquv kompressor agregatlariga xizmat ko‘rsatish, porshenli kompressorlarning tarkibiy qismlarini boshqarmaning ichki imkoniyatlaridan kelib chiqib, ta’mirlash bo‘yicha stansiyaning o‘zida amalga oshirilayotgan ishlar bilan tanishildi.
Konda ishlatish quduqlarining burg‘ilash bo‘yicha ishlarni o‘rganish maqsadida, “Dengizko‘l” konidagi 320-sonli, “O‘rtabuloq” konidagi 239-sonli va gelogik izlov-qidiruv ishlari doirasidagi “O‘rtabo‘loq” (terrigen Yura) 3-sonli quduqlarda olib borilayotgan burg‘ilash ishlari joyidan ko‘zdan kechirildi.
Bu yerda burg‘ilash ishlariga jalb qilingan pudradchi tashkilot rahbarlari bilan yil oxirigacha burg‘ilashdan ishga tushirilishi rejalashtirilgan ishlar holati muhokama qilinib, reja ko‘rsatkichlarining bajarilishini ta’minlash vazifasi yuklatildi hamda burg‘ilash ishlarini jadallashtirish, zarur material-texnik resurslar bilan ta’minlash bo‘yicha topshiriqlar berildi.
O‘z navbatida boshqaruv raisi bu yerda mehnat faoliyatini olib borayotgan ishchi xodimlar uchun yaratilgan sharoitni o‘rganish maqsadida, mavjud kamchiliklar haqida ularning ijobiy natijalarga erishish uchun qilinishi lozim bo‘lgan ishlar haqida burg‘ilash ustasi bilan yaqindan suhbatda bo‘ldi.
Boshqaruv raisi, shuningdek, kunlik burg‘ilash chuqurligi, yer qatlami holati, texnik vositalar va jihozlarning yetarli yoki yo‘qligi bo‘yicha savollariga javob oldi.
Aniqlangan mavjud kamchiliklar va holatlarni tezkor ravishda bartaraf etish bo‘yicha tegishli departament va boshqarma boshliqlariga ko‘rsatmalar berildi.
Kunlik gaz qazib chiqarish ko‘rsatkichlarining barqarorligini ta’minlashda muhim yo‘nalishlardan biri bo‘lgan quduqlarni mukammal ta’mirlash va intensifikatsiya yo‘nalishlarida olib borilayotgan ishlar “Dengizko‘l” 12-sonli qudug‘idagi ta’mirlash ishlarini o‘rganish davomida ham muhokama qilindi.
Bu yerda ham pudratchi tashkilot rahbarlari bilan olib borilayotgan ishlar, natijadorlikni oshirish, ta’mirlash ishlarini jadallashtirishga doir masalalar yuzasidan muhokama o‘tkazilib, mas’ullarga topshiriqlar berildi.
“O‘zbekneftgaz” AJ boshqaruvi raisi boshchiligidagi ishchi guruh tomonidan tabiiy gaz quduqlari, konlaridagi qazib chiqarish bo‘yicha ishlar holatini o‘rganish davom etadi.
“O‘zbekneftgaz” AJ matbuot xizmati
Izoh (0)