Navoiy viloyatining Xatirchi tumanida fuqarolar tilla kukuni bo‘lgan qumlarni talashib, bir-biriga tosh va tayoqlar bilan tashlanib, ommaviy tus olgan janjalning oldi olindi. Bu haqda “Daryo”ga viloyat IIB axborot xizmati ma’lum qildi.
Bildirilishicha, uzoq yillardan buyon “Navoiy tog‘-kon metallurgiya” kombinati tomonidan tarkibida tilla kukuni bo‘lgan katta miqdordagi qumlar uyumi Zarafshon cho‘l tizmasi hamda Xatirchi tumanining belgilangan hududida to‘plab boriladi. Bu qumlar tog‘i kelajakda tarkibidan tilla ajratib olish va yana qayta ishlov berishga mo‘ljallangan.Xatirchi tumanida foydalanishdan to‘xtatilgan tilla konlarini qo‘lbola usulda, qonunga xilof ravishda o‘zlashtirib, daromad olayotgan mahalliy fuqarolarga nisbatan juda ko‘p marotaba chora ko‘rilgan. Shunga qaramay, fuqarolar bunday qumlarni aylanma va yashirin yo‘llar orqali tashishgan.
Ta’kidlanishicha, o‘zini konlarning “egalari” deb bilgan tumandagi Oltinsoy va Chilosh qishlog‘ining ikki nafar fuqarosi Shohruh Ibragimov hamda Mirzohid Murodov o‘zaro kon talashib, mushtlashishgan. Holatdan xabar topgan profilaktika katta inspektori Nodir Rahmonov voqea joyiga yetib kelgan. Bu ikki fuqaroga profilaktik tushuntirish ishlari olib borilishiga qaramay, ular bir-birini qo‘pol so‘zlar bilan haqoratlashda davom etgan. Janjal asnosida kon talashish oqibatida ikki qishloq fuqarolari o‘rtasida ham katta janjal kutilayotganiga ishora qilingan. Shu payt Oltinsoy qishlog‘ida yashovchi 33 nafar hamda Chilash qishlog‘ida yashovchi 20 nafarga yaqin fuqaro taxminan 40-50 metr oraliq masofada bir-birlarini haqorat qilib, janjal qilish maqsadida qo‘llariga tosh va tayoqlar olib, to‘plana boshlagan. Vaziyat og‘irligini anglagan profilaktika inspektori zudlik bilan rahbariyatga xabar bergan. Qo‘shimcha kuch vositalari yetib kelguncha inspektor aholi va fuqarolarni tinchlantirish choralarini ko‘rgan. Ammo fuqarolar jamiyatda yurish-turish qoidalarini mensimay, bir-birini uyatli so‘zlar bilan haqorat qilishdan, inspektor talablarini bajarmasdan, janjal va to‘polonda davom etgan. Oqibatda bir-biriga hamda IIB xodimlarining avtomashinalariga toshlar otib, profilaktika katta inspektori, podpolkovnik Nodir Rahmonovga tegishli bo‘lgan Matiz rusumli avtomashinaning orqa oynasini sindirgan.
Voqea joyiga IIB tergov tezkor guruhi hamda qo‘shimcha 20 nafar xodim yetib kelib, bir necha daqiqada ommaviy tus olgan katta janjalni to‘xtatgan.
Mazkur ommaviy janjalni sodir etgan fuqarolarni aniqlash maqsadida Navoiy viloyati va tuman IIB xodimlaridan iborat guruhlar tuzilib, har bir qishloq va ko‘chalarda tungi xizmat hamda patrullik naryadlari soni oshirilgan. Jinoiy holatga yetaklovchi xatti-harakatlarga oydinlik kiritilgan.
“Jamiyatdagi qonun buzilish holatlariga duch kelganimizda aksariyat hollarda bir tomonlama baho beramiz. Vaholanki, mohiyatini chuqurroq anglaydigan bo‘lsak, har qanday og‘ir jinoyatning oldini olishning hech bo‘lmaganda, bitta yo‘li mavjudligiga guvoh bo‘lamiz. Xatirchi tumanidagi ushbu holat, ya’ni bir-birlariga ‘kichik urush’ e’lon qilgan qishloq fuqarolari janjal oqibatida og‘ir tan jarohat olishi yoki kimningdir hayotiga jiddiy xavf solishi mumkin edi. Profilaktika inspektori o‘z vaqtidagi to‘g‘ri qaror qabul qilgani va sergakligi sabab katta talofat va jinoyatchilikning oldi olindi. Adovatni adolat yengar, deganlaridek, sodir etilgan huquqbuzarlik tufayli Jinoyat ishlari bo‘yicha Xatirchi tumani sudi tomonidan 28 nafar fuqaroga nisbatan sayyor sud yig‘ilishi o‘tkazildi. Ulardan 26 nafariga 15 sutka, 2 nafariga esa 10 sutkadan ma’muriy qamoq jazosi belgilandi”, — dedi Navoiy viloyati IIB axborot xizmati rahbari O‘ktam Usmonov.
Izoh (0)