Президент Шавкат Мирзиёев 10 сентябрь, жума куни Токиодаги ёзги Паралимпия ўйинлари иштирокчилари билан ўтказилган учрашувда 2024 йилда Парижда бўладиган Паралимпия ўйинларига аниқ тизим асосида тайёргарлик кўриш зарурлигини айтди. Бу ҳақда «Дарё» мухбири хабар бермоқда.
«Эришган ютуқларимизни мустаҳкамлаб, ватанимизнинг спорт соҳасидаги улкан салоҳиятини тобора кенгроқ намоён этиш учун 2024 йилда Парижда бўладиган Паралимпия ўйинларига бугундан бошлаб аниқ тизим асосида тайёргарлик кўришимиз зарур.
Жумладан, келгуси мусобақаларга стол тенниси, қиличбозлик, камондан отиш, велоспорт, от спорти, бадминтон сингари турлар бўйича ҳам йўлланмалар учун курашиш керак.
Шу муносабат бўлғуси Паралимпия ўйинларига пухта ҳозирлик кўриш учун, хорижий мамлакатлардан энг тажрибали мутахассис ва мураббийларни жалб қиламиз.
Шу билан бирга, жойларда жисмоний имконияти чекланган фуқароларимиз ўртасида паралимпия ҳаракатини ривожлантириш дастурларини ишлаб чиқиб, амалга оширишимиз зарур», — деди Шавкат Мирзиёев.
Давлат раҳбари пара-спорт турлари бўйича иқтидорли атлетларни саралаш ва уларнинг захирасини шакллантириш тизимини такомиллаштириш лозимлигини қайд этди.
«Хусусан, спорт таълими масканларида тегишли ўқитиш дастурлари ва методикасини жорий қилиш билан бирга, уларда паралимпия бўлимларини ташкил этиб, қўшимча квоталар ажратамиз.
Азиз Абдуҳакимов М.Тошхўжаев билан бирга, икки ой муддатда спорт мактабларида жисмоний имконияти чекланган болалар учун махсус гуруҳлар фаолиятини йўлга қўйсин.
Шунингдек, жисмоний имконияти чекланган ёшлар орасида спортга қизиқиши кучли бўлган йигит-қизлар кўплаб топилади. Тиббий-ижтимоий эксперт комиссияси билан ҳамкорликда, жойларда селексия ишларини тизимли йўлга қўйиш лозим.
Абдуҳакимов, А.Инаков, М.Тошхўжаев икки ой муддатда жойларда спортга қобилияти бор ана шундай ёшларимизни пара-спорт турларига кенг жалб этиш ва уларни тарбиялашни назарда тутадиган ҳукумат қарорини тайёрласин», — дея мутасаддиларга топшириқ берди Президент.
Изоҳ (0)