Навоийда тилла конларини талашган икки қишлоқ аҳолиси ўртасида чиққан оммавий жанжални бостиришга 20 дан ортиқ ИИБ ходими жалб қилинди

Навоий вилоятининг Хатирчи туманида фуқаролар тилла кукуни бўлган қумларни талашиб, бир-бирига тош ва таёқлар билан ташланиб, оммавий тус олган жанжалнинг олди олинди. Бу ҳақда «Дарё»га вилоят ИИБ ахборот хизмати маълум қилди.

Хатирчи туманида фойдаланишдан тўхтатилган тилла конларини қўлбола усулда, қонунга хилоф равишда ўзлаштириб, даромад олаётган маҳаллий фуқароларга нисбатан жуда кўп маротаба чора кўрилган. Шунга қарамай, фуқаролар бундай қумларни айланма ва яширин йўллар орқали ташишган.

Таъкидланишича, ўзини конларнинг «эгалари» деб билган тумандаги Олтинсой ва Чилош қишлоғининг икки нафар фуқароси Шоҳруҳ Ибрагимов ҳамда Мирзоҳид Муродов ўзаро кон талашиб, муштлашишган. Ҳолатдан хабар топган профилактика катта инспектори Нодир Раҳмонов воқеа жойига етиб келган. Бу икки фуқарога профилактик тушунтириш ишлари олиб борилишига қарамай, улар бир-бирини қўпол сўзлар билан ҳақоратлашда давом этган. Жанжал асносида кон талашиш оқибатида икки қишлоқ фуқаролари ўртасида ҳам катта жанжал кутилаётганига ишора қилинган. Шу пайт Олтинсой қишлоғида яшовчи 33 нафар ҳамда Чилаш қишлоғида яшовчи 20 нафарга яқин фуқаро тахминан 40-50 метр оралиқ масофада бир-бирларини ҳақорат қилиб, жанжал қилиш мақсадида қўлларига тош ва таёқлар олиб, тўплана бошлаган. Вазият оғирлигини англаган профилактика инспектори зудлик билан раҳбариятга хабар берган. Қўшимча куч воситалари етиб келгунча инспектор аҳоли ва фуқароларни тинчлантириш чораларини кўрган. Аммо фуқаролар жамиятда юриш-туриш қоидаларини менсимай, бир-бирини уятли сўзлар билан ҳақорат қилишдан, инспектор талабларини бажармасдан, жанжал ва тўполонда давом этган. Оқибатда бир-бирига ҳамда ИИБ ходимларининг автомашиналарига тошлар отиб, профилактика катта инспектори, подполковник Нодир Раҳмоновга тегишли бўлган Matiz русумли автомашинанинг орқа ойнасини синдирган.

Воқеа жойига ИИБ тергов тезкор гуруҳи ҳамда қўшимча 20 нафар ходим етиб келиб, бир неча дақиқада оммавий тус олган катта жанжални тўхтатган.

Мазкур оммавий жанжални содир этган фуқароларни аниқлаш мақсадида Навоий вилояти ва туман ИИБ ходимларидан иборат гуруҳлар тузилиб, ҳар бир қишлоқ ва кўчаларда тунги хизмат ҳамда патруллик нарядлари сони оширилган. Жиноий ҳолатга етакловчи хатти-ҳаракатларга ойдинлик киритилган.

«Жамиятдаги қонун бузилиш ҳолатларига дуч келганимизда аксарият ҳолларда бир томонлама баҳо берамиз. Ваҳоланки, моҳиятини чуқурроқ англайдиган бўлсак, ҳар қандай оғир жиноятнинг олдини олишнинг ҳеч бўлмаганда, битта йўли мавжудлигига гувоҳ бўламиз. Хатирчи туманидаги ушбу ҳолат, яъни бир-бирларига ‘кичик уруш’ эълон қилган қишлоқ фуқаролари жанжал оқибатида оғир тан жароҳат олиши ёки кимнингдир ҳаётига жиддий хавф солиши мумкин эди. Профилактика инспектори ўз вақтидаги тўғри қарор қабул қилгани ва сергаклиги сабаб катта талофат ва жиноятчиликнинг олди олинди. Адоватни адолат енгар, деганларидек, содир этилган ҳуқуқбузарлик туфайли Жиноят ишлари бўйича Хатирчи тумани суди томонидан 28 нафар фуқарога нисбатан сайёр суд йиғилиши ўтказилди. Улардан 26 нафарига 15 сутка, 2 нафарига эса 10 суткадан маъмурий қамоқ жазоси белгиланди», — деди Навоий вилояти ИИБ ахборот хизмати раҳбари Ўктам Усмонов.