Тошкент вилоятида эмлангандан сўнг вафот этган фуқаро ўлимига вакцина сабаб эмаслиги аниқланди

Тошкент вилоятида коронавирусга қарши эмланганидан сўнг вафот этгани айтилган фуқаро бўйича ҳолат назоратга олиниб, тезкор гуруҳ тузилгани ҳақида хабар берилганди. Соғлиқни сақлаш вазирлиги тезкор гуруҳ ўрганишлари натижасини эълон қилди.

Тезкор гуруҳ таркибига

• Республика суд-тиббий экспертиза илмий-амалий маркази директори, вазирлик бош суд-тиббий эксперти, профессор А.Искандаров;
• Санитария-эпидемиология ва жамоат саломатлиги хизмати иммунопрофилактика бўлими бошлиғи Д.Турсунова;
• бош инфекционист Б.Таджиев;
• бош токсиколог А.Стопниский;
• бош терапевт У.Камилова;
• бош аллерголог И.Разикова каби мутахассислар киритилган эди.

«1983 йил 18 июнда туғилган марҳум С.Қ. 2021 йилнинг 10 августида соат 11:00 ларда ‘Туябўғиз’ оилавий шифокорлик пунктида, оилавий шифокор кўригидан ўтказилиб, эмлашга монелик қилувчи ҳолатлар аниқланмагач, вакцинатор ҳамшира томонидан эмланган.

Вакцина олгандан кейин 20 дақиқа давомида оилавий шифокор кузатувида бўлган ва акс таъсирлар кузатилмагач, уйига рухсат берилган. Экспертизада марҳум С.Қ.нинг танасида жароҳат излари аниқланмади», — дейди Республика суд-тиббий экспертиза илмий-амалий маркази директори, вазирлик бош суд-тиббий эксперти А.Искандаров.

Суд-тиббий экспертизаси хулосасига кўра, марҳум С.Қ.нинг 2021 йил 13 август, яъни у эмланганидан 3 кун ўтиб юз берган ўлими эмлашдан сўнг унинг соғлиғида содир бўлган ўзгариш ва шифокорлар томонидан тавсия этилган препаратлар билан боғлиқ эмаслиги аниқланди.

Қайд этилишича, эмлашга энг асосий монеликлардан бири ҳисобланган анафилактик шок ҳолати ва бошқа салбий таъсирлар вакцина қилингандан кейин 30 дақиқа ичидагина рўй бериши мумкин.

Шу билан бирга, кимёвий моддалар билан заҳарланиш клиник белгилари ҳам кузатилмаган.

Суд-тиббий экспертизанинг якуний хулосасига кўра, марҳум ҳаётлигида ўткир зотилжам, бош мия ва миячанинг менигоэнсефалити, эпимиокардит касалликлари билан оғриган бўлиб, бу хасталиклар унинг ўлими билан тўғридан-тўғри боғлиқликка эга экани аниқланди.

Таъкидланишича, бугунга қадар Тошкент вилоятида 1 199 127 доза вакцина эмлаш жараёнларида қўлланилган. Эмланган беморлар орасида вакцина таъсирида бирорта ҳам жиддий салбий таъсирлар кузатилмаган.