Ijtimoiy tarmoqlarda Innovatsion rivojlanish vazirligi oldidagi asfaltlangan yo‘l MCHJga berib yuborilgani, faqat vazirlik xodimlarigina bu yo‘ldan o‘tishiga ruxsat berilgani to‘g‘risida xabar tarqaldi. Vazirlik xabar yuzasidan izoh berdi.
Ma’lum qilinishicha, 7-sentabr kuni “Beruniy” metro bekati tomondan Universitet ko‘chasiga kirish yo‘li berkitilgan va bu barcha qatori Innovatsion rivojlanish vazirligi xodimlariga ham noqulaylik tug‘dirgan. 7-sentabr kuni vazirlikda bo‘lib o‘tgan yirik xalqaro ilmiy-amaliy konferensiyaga tashrif buyurgan mehmonlar, OAV vakillari ham yo‘l yopiq bo‘lgani bois vazirlikka kirishga qiynalgan.
Qayd etilishicha, ushbu yo‘lning 7-sentabr kuni yopilishiga Innovatsion rivojlanish vazirligining aloqasi yo‘q. “Beruniy” metro bekati yonidagi avtoturargohni tartibga solishga mas’ul “Poytaxt Avto Parking” MCHJda faoliyat yuritayotgan xodimlar Talabalar shaharchasiga keladigan avtomashinalarning avtoturargohga qo‘yilishini ta’minlash maqsadida ushbu yo‘lni yopib qo‘yishgani ma’lum bo‘ldi.
Shundan so‘ng Olmazor tumani hokimiyati tomonidan “Beruniy” metrosidan Universitet ko‘chasiga transport harakati ochib qo‘yilgan. Universitet ko‘chasidan avtomashinalarning to‘siqlarsiz kirib-chiqishi ta’minlanmoqda.
Izoh (0)