Ijtimoiy tarmoqda “Ippodromda haydovchi va GAI xodimlari o‘rtasida janjal” sarlavhasi ostida video tarqaldi. YHXBB videoda aks etgan holat yuzasidan ma’lumot berdi.
Unda aytilishicha, 3-sentabr kuni soat 21:45 larda KHAY ko‘chasi “Abu-Saxiy” bozori avtoturargohidan chiqishda Cobalt haydovchisi yo‘lning harakat qatnov qismiga avtoulovini to‘xtatgan vaqtida shu yerda xizmat olib borayotgan YPX inspektorlari mashinani avtoturargohga qo‘yish lozimligi haqida ogohlantirgan.
Haydovchi 2001-yilda tug‘ilgan J.M. mashinani haydab ketib, harakatlanish jarayonida o‘z yo‘nalishida o‘zidan oldinda harakatlanib ketayotgan Spark haydovchisi bilan yo‘l talashib qolgan. Cobalt haydovchisi mashinasidan bita sport anjomini olib, Spark haydovchisi bilan janjallashayotganida YPX inspektorlari holatning oldini olish uchun fuqaro J.M.ni ushlab, o‘zi va avtouloviga tegishli hujjatlarini taqdim qilishini so‘raganda haydovchi hujjatini YPX inspektorlariga taqdim qilmagan.
Shundan so‘ng fuqaro J.M. Toshkent shahar Chilonzor tuman 5-son IIO FMBga olib borilib, tegishli hujjatlarsiz transport vositasini boshqarganligi uchun Ma’muriy javobgarlik to‘g‘risidagi kodeksning 135-moddasiga (yo‘l harakati qoidalarida nazarda tutilgan hujjatlari bo‘lmagan shaxslarning transport vositalarini boshqarishi) asosan ma’muriy bayonnoma rasmiylashtirib, fuqaroga tegishli chora ko‘rish uchun ichki ishlar bo‘limiga topshirilgan.
Bundan avval Toshkentdagi “Novza” masjidiga juma namoziga kelgan haydovchilar mashinalari jarimaga tortilayotgani aytilgan video bo‘yicha izoh berilgandi.
Izoh (0)