Ижтимоий тармоқда «Ипподромда ҳайдовчи ва ГАИ ходимлари ўртасида жанжал» сарлавҳаси остида видео тарқалди. ЙҲХББ видеода акс этган ҳолат юзасидан маълумот берди.
Унда айтилишича, 3 сентябрь куни соат 21:45 ларда КҲАЙ кўчаси «Абу-Сахий» бозори автотураргоҳидан чиқишда Cobalt ҳайдовчиси йўлнинг ҳаракат қатнов қисмига автоуловини тўхтатган вақтида шу ерда хизмат олиб бораётган ЙПХ инспекторлари машинани автотураргоҳга қўйиш лозимлиги ҳақида огоҳлантирган.
Ҳайдовчи 2001 йилда туғилган Ж.М. машинани ҳайдаб кетиб, ҳаракатланиш жараёнида ўз йўналишида ўзидан олдинда ҳаракатланиб кетаётган Spark ҳайдовчиси билан йўл талашиб қолган. Cobalt ҳайдовчиси машинасидан бита спорт анжомини олиб, Spark ҳайдовчиси билан жанжаллашаётганида ЙПХ инспекторлари ҳолатнинг олдини олиш учун фуқаро Ж.М.ни ушлаб, ўзи ва автоуловига тегишли ҳужжатларини тақдим қилишини сўраганда ҳайдовчи ҳужжатини ЙПХ инспекторларига тақдим қилмаган.
Шундан сўнг фуқаро Ж.М. Тошкент шаҳар Чилонзор туман 5-сон ИИО ФМБга олиб борилиб, тегишли ҳужжатларсиз транспорт воситасини бошқарганлиги учун Маъмурий жавобгарлик тўғрисидаги кодекснинг 135-моддасига (йўл ҳаракати қоидаларида назарда тутилган ҳужжатлари бўлмаган шахсларнинг транспорт воситаларини бошқариши) асосан маъмурий баённома расмийлаштириб, фуқарога тегишли чора кўриш учун ички ишлар бўлимига топширилган.
Бундан аввал Тошкентдаги «Новза» масжидига жума намозига келган ҳайдовчилар машиналари жаримага тортилаётгани айтилган видео бўйича изоҳ берилганди.
Изоҳ (0)